- बिहीबार, ११ असोज, २०८०
दैलेख, ६ वैशाख – जिल्लाको विभिन्न ठाउँमा चट्याङ लागेर ११ जना घाइते भएका छन् । नौमूले गाउँपालिकाको–२ मा बुधवार राति परेको चट्याङ लागेर ७ जना घाइते भएका हुन् ।
गाउँपालिका २ बालुवाटारको नौफेरीमा बारीमा चट्याङ पर्दा घरमा बसिरहेका ७ जना घाइते भएको जिल्ला प्रहरी कार्यालय दैलेखका प्रहरी नायव उपरीक्षक ठाकुरप्रसाद पोखरेलले जानकारी दिए ।
घाइते मध्ये १ जनाको जिल्ला अस्पताल दैलेख र अन्यको प्राथमिक स्वास्थ्य केन्द्र नौमुलेमै उपचार भइरहेको प्रहरीले जनाएको छ । यस्तै दैलेखको महावु गाउँपालिका ६ लामिडाँडाको कुईयाँपानीमा बिहीबार साँझ परेको चट्याङ लागेर ४ जना महिला घाइते भएका छन् ।
महावु गाउँपालिका ४ का जयबहादुर शाहीको घरमा परेको चट्याङ लागेर आँगमा आमा समूहको बैठक बसिरहेका महिलाहरू घाइते भएको प्रहरीले जनाएको छ ।
घाइते मध्ये ४५ बर्सिया जयकुवँरा शाही र ६३ बर्सिया लाल सरा रावत बेहोस भएको र २६ वार्षिया गीता विक र १७ बर्षिया अनिता शाही अर्धचेत भएको जिल्ला प्रहरी कार्यालय दैलेखका प्रहरी नायव उपरीक्षक ठाकुरप्रसाद पोखरेलले बताए ।
घाइते सबैको स्थानीय मेडिकलमा उपचार पछि घर फर्किएको प्रहरी उपरीक्षक पोखरेलले जानकारी दिएका छन् ।
