बागलुङ, १६ कात्तिक- प्रेस चौतारी नेपाल बागलुङको अध्यक्षमा उमाकान्त शर्मा चयन भएका छन् ।
शनिबार सम्पन्न पाचौं जिल्ला सम्मेलनले शर्माको अध्यक्षतामा आगामी तीन वर्षका लागि नयाँ कार्यसमिति चयन गरेको हो । १५ सदस्यीय समितिका उपाध्यक्षमा नवीनशिशिर विक, सचिवमा सिर्जना पन्त, उपसचिवमा बालकृष्ण सुवेदी र कोषाध्यक्षमा रवीना बोहरालाई चयन गरिएको छ ।
त्यस्तै सदस्यमा युवराज कँडेल, कमला क्षेत्री, राजेश बर्देवा, खेमराज गौतम, सुमन रामदाम, रुद्र गौतम, अर्जुन कार्की, जयन्द्र उपाध्याय, वीरबहादुर थापा र भूपेन्द्र केसी निर्वाचित भएका छन् ।
अधिवेशनले प्रेस स्वतन्त्रतालाई नयाँ बन्ने संविधानको प्रस्तावनामा उल्लेख गरी समयमै संविधान जारी गर्न माग गर्नेलगायत सातबुँदे समसामयिक प्रस्तावसमेत पारित गरेको छ ।