- शनिबार, १५ वैशाख, २०८१
काठमाण्डु, २४ जेठ– अवरुद्ध व्यवस्थापिका–संसदको बैठक सुचारु गर्न प्रमुख राजनीतिक सहमतिनजिक पुगेका छन्।
प्रधानमन्त्री सुशील कोइरालाको पहलमा शनिबार बालुवाटारमा बसेको प्रमुख तीन दलका शीर्ष नेताको बैठक सकारात्मक भएको बैठकपछि नेताहरुले बताएका छन् ।
दलहरुबीच बजेट रकमान्तर, संविधानसभा निर्वाचनमा भएको धाँधली र नेपाल प्रहरीको एआईजी बढुवामा भएको आर्थिक चलखेल छानबिनका लागि छुट्टाछुट्टै संसदीय समिति गठन गर्ने सहमति भएको छ ।
उच्चस्तरीय राजनीतिक समिति गठनमा समेत सैद्धान्तिक सहमति जुटेको भए पनि नेृतृत्वका बारेमा भने विवाद भएको छ । एकीकृत माओवादीले समितिको नेतृत्वमा आफ्नो दाबी गरेको छ । एमाले र काँग्रेसले भने चक्रीय प्रणालीका आधारमा नेतृत्व गर्नुपर्ने अडान लिएका छन् ।
बैठकपछि काठमाण्डु टुडेसँग कुरा गर्दै एमाओवादी उपाध्यक्ष पोष्टबहादुर बोगटीले छलफल सकारात्मक भएको र आइतबार संसद् बैठकअघि पुन: बैठक बसेर सहमतिलाई अन्तिम प्रयास गरिने बताए ।
बैठकमा प्रमुख तीन दल काँग्रेस, एमाले र एकीकृत माओवादीका शीर्ष नेता सहभागी थिए । एमाओवादीले गत ९ पुसमा प्रमुख दलबीच भएको चार बुँदे सहमति कार्यान्यवन, विभिन्न मान्त्रालयबाट गरिएको ४ अर्बभन्दा बढीको रकमान्तर र नेपाल प्रहरीको इआईजी बढुवामा भएको आर्थिक चलखेल सम्बन्धमा छानबिन गर्न संसदीय समिति गठन गर्नुपर्ने माग राख्दै व्यवस्थापिका–संसद बैठक अवरुद्ध गर्दै आएको छ ।
प्रमुख प्रतिपक्षीको अवरोधका कारण संसदको वर्षे अधिवेशन प्रभावित भएको छ । संसद् बैठक आइतबार बस्दैछ ।
