विमानस्थल भन्सार कार्यालयमा अख्तियारको छापा

काठमाण्डु, २६ वैशाख– अख्तियार दुरुपयोग अनुसन्धान आयोगले त्रिभुवन अन्तर्राष्ट्रिय विमानस्थल भन्सार कार्यालयमा छापा मारेको छ ।
विभिन्न मुलुकबाट आयात भएका सामग्रीको आयातकर्ताले न्यून बिजीकरण गरी राज्य कोषमा दाखिला हुनुपर्ने कर छलेको विशेष सूचनाको आधारमा आयोगले छापा मारेको हो ।
आन्तरिक राजस्व अनुसन्धान विभागका पदाधिकारीसहितको आयोगको टोलीले रु ११ लाख ५८ हजार २४० बिजक मूल्यका जाँचपास भएका एक लाख ५० हजार थान जापानी ‘वाच मुभमेन्ट’ र रु १३ लाख ८९ हजार आठसय ८८ बिजक मूल्य भएका मोबाइलमा प्रयोग हुने चार ‘गिगा बाइट’ क्षमताका ३६ हजार थान मोबाइल सेक्योर डिजिटल चिप्स बरामद गरेको आयोगले जनाएको छ ।
आयोगका अनुसार बरामद गरिएका ती सामग्री राजस्व अनुसन्धान विभागको जिम्मा लगाइएको छ । आयोगले ती सामग्री कसले आयात गरेको र उनीहरूमाथि कस्तो कारबाही हुन्छ भन्नेबारेमा भने केही उल्लेख गरेको छैन ।