काठमाण्डु, २९ चैत – प्रधानमन्त्री सुशील कोइराला र एमाओवादी अध्यक्ष पुष्पकमल दाहालबीच शनिबार भेटवार्ता भएको छ ।
प्रधानमन्त्रीको सरकारी निवास बालुवाटारमा भएको भेटमा २६ सभासद्को मनोनयन, संविधान लेखन र पछिल्लो राजनीतिक अवस्थाका बारेमा कुराकानी भएको थियो ।
साथै भेटमा संविधानसभा अन्तर्गत राजनीतिक सम्वाद समितिको सभापति चयनका विषयमा समेत कुराकानी भएको बालुवाटार स्रोतले जनाएको छ ।
सो अवसरमा प्रधानमन्त्री कोइरालाले संविधानसभाको पूर्णता र राजनीतिक सम्वाद समितिको नेतृत्व चयनमा सहयोग गर्न आग्रह गरेका थिए । राजनीतिक सम्वाद समितिको नेतृत्वमा एमाओवादीले दावी गर्दै आएको छ ।
यसअघि शुक्रबार एमाओवादी अध्यक्ष प्रचण्ड र एमाले अध्यक्ष झलनाथ खनालबीच कुराकानी भएको थियो ।