- मंगलबार, १७ असार, २०८२
काठमाण्डु, २७ चैत – नेपाल स्वरोजगार व्यापार श्रमिक संघले वैकल्पिक स्थानको व्यवस्था गरिनुपर्नेलगायत माग राख्दै बल्खुस्थित नेकपा एमालेको केन्द्रीय कार्यालय विहीबार घेराउ गरेको छ । सो संघले सडक व्यवसायीलाई व्यवस्थित तथा मर्यादित बनाउनुपर्नेलगायत माग राख्दै आएको छ ।
व्यवसायीले दोस्रो चरणको आन्दोलनअन्तर्गत विभिन्न राजनीतिक दलका कार्यालयमा घेराउ गर्दै आएका छन् । सडकपेटीमा व्यवसाय गर्दा पैदल यात्रुलाई हिँडडुल गर्न असहज भई समस्या आएको भन्दै सरकारले गत फागुन १४ देखि सो व्यवसाय सञ्चालनमा प्रतिबन्ध लगाएको थियो ।
त्यसपछि राष्ट्रिय स्वरोजगार व्यापार सङ्घ, संयुक्त व्यापार व्यवसायी संगठन नेपाल आबद्ध श्रमिक एकताबद्ध भई पहिलो चरणको आन्दोलन गरेका थिए ।
व्यवसायीले कलङ्कीमा जम्मा भई पदयात्रासहित सो कार्यालय आई घेराउ गरेका थिए । घेराउका क्रममा सो आसपास क्षेत्रमा सवारी साधन आवतजावतमा अवरोध पुगेको थियो ।
स्वरोजगार व्यापार श्रमिक संघका महासचिव माया गुरुङले स्वरोजगार व्यवसायीमाथि हुने दुव्र्यवहार बन्द गरी व्यावसायिक क्षेत्रमा शान्ति सुरक्षा कायम गर्नुपर्ने माग गरिन् ।
