- शनिबार, ८ वैशाख, २०८१
सिरहा, २४ चैत – विवादित ऐतिहासिक पोखरीमा माछा मार्ने विषयमा विवाद हुँदा लक्ष्मीपुर पतारी गाविसस्थित जनता माध्यमिक विद्यालयमा तोडफोड भएपछि सो विद्यालयले लिने कक्षा ८ को परीक्षा स्थगन भएको छ ।
पोखरी विवादमा परेकाले लक्ष्मीपुरका जनताले माछा मार्न नदिएपछि महेशपुरवासीले विद्यालयमा आक्रमण गरेर डेस्क, बेन्च, कुर्सी, झ्याल, ढोका र कम्प्युटरलगायत समान तोडफोड गरेको विद्यालयका प्रधानाध्यापक विनोद सिंहले जानकारी दिए । तोडफोडबाट विद्यालयमा लाखौँ रुपैयाँ बराबरको क्षति भएको छ ।
विद्यालयमा तोडफोड भएपछि ११ बजे हुने परीक्षाका लागि विद्यार्थी उपस्थित नभएका कारण परीक्षा नै स्थगन गरिएको छ ।
ऐतिहासिक ‘पतारी पोखरी’ लक्ष्मीपुर गाविसमा रहे पनि महेशपुरवासीले आफ्नो गाविसमा पोखरी रहेको दाबी गरेपछि विवादले उग्र रुप लिएको हो ।
