- बिहीबार, १३ वैशाख, २०८१
याङगुन (म्यान्मार), २१ फागुन – प्रधानमन्त्री सुशील कोइरालाले बहुपक्षीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)का सदस्य मुलुकहरुले सहमति, सहकार्य, एकता र पारस्परिक मेलमिलापबाटै यस क्षेत्रको गरिबी निवारण र समृद्धि सुनिश्चित गर्न सक्ने बताएका छन् ।
म्यान्मारको राजधानी नेपिटमा सम्पन्न बिम्स्टेकको तेस्रो शिखर सम्मेलनमा भाग लिएर फर्कने क्रममा नेपाली प्रतिनिधिमण्डलका नेता प्रधानमन्त्री कोइरालाले सम्मेलनका उपलब्धि तथा आफ्ना अनुभवबारे संक्षिप्त प्रतिक्रिया दिँदै युरोपेली सङ्घ, दक्षिण पूर्वी एसियाली राष्ट्रहरुको सङ्गठन–आसियानले जस्तै बिम्स्टेक क्षेत्रमा व्याप्त गरिबी कम गर्दै आर्थिक विकास गर्न सकिने बताए ।
उनले भने, ‘सहमति, सहकार्य, एकता र दृढ इच्छा शक्ति त्यस निम्ति पहिलो शर्त हो । सातवटै सदस्य राष्ट्र एकताबद्ध भएपछि लक्ष्यमा पुग्न गाह्रो हुँदैन ।’
ती संगठनले साझा मुद्रा र निःशुल्क प्रवेशाज्ञाको व्यवस्था गरेजस्तो बिम्स्टेकले तत्काल गर्न नसकेपनि यस भेगका गरिबीको चपेटामा परेका जनसाधारणलाई त्यसबाट मुक्त गर्न सकिने प्रधानमन्त्रीले बताए ।
बिम्स्टेकलाई सुदृढ एवम् सबल बनाउन तथा सङ्गठनलाई व्यवस्थित गर्न स्थायी सचिवालयको व्यवस्था, महासचिवको नियुक्ति, भारत र भुटानमा जल तथा मौसम र साँस्कृतिक उद्योगसम्बन्धी विशिष्टिकृत निकायको स्थापनाले बिम्स्टेक प्रक्रियालाई नयाँ उचाइ दिएको उहाँले उल्लेख गरे ।
थाइल्याण्डबाहेक अन्य पाँच मुलुकका राष्ट्र÷सरकार प्रमुखबीच भएका भेटवार्ता, ती देशसँगको पारस्परिक सम्बन्ध अझ प्रगाढ बनाउन तथा नेपालको आर्थिक–सामाजिक विकासमा सहयोगका सम्भावित क्षेत्रहरु पहिल्याउन र उनीहरुका विचार बुझ्न महत्वपूर्ण भएको उनको कथन थियो ।
बिम्स्टेक क्षेत्रमा शान्ति, स्थायित्व, समृद्धि र आपसी भाइचारा बढाउन पनि उपक्षेत्रीय सम्मेलन फलदायी भएको र समग्रमा सम्मेलन तथा आफ्नो भ्रमण सफल भएको उनले बताए ।
सदस्य मुलुकको नेपालप्रतिको अवधारणा, ती देशबाट नेपालमा लगानी ल्याउने प्रयास तथा सम्मेलनको घोषणापत्रमै अल्पविकसित मुलुकलाई विकासशील राष्ट्रले सघाउने विषय पारित हुनुलाई प्रधानमन्त्रीले उपलब्धिका रुपमा प्रस्तुत गरे ।
नेपालले बिम्स्टेकको अध्यक्षता लिनुपनि उपलब्धि भएको उनले बताए । बिम्स्टेक क्षेत्रमा शान्ति, समृद्धि र स्थायित्वका निम्ति सदस्य मुलुकले व्यक्त गरेको प्रतिबद्धता र ऐक्यबद्धतालाई पनि प्रधानमन्त्रीले उपलब्धिको संज्ञा दिए ।
राजधानी नेपिटबाट विशेष विमानबाट यहाँ आएका प्रधानमन्त्री कोइरालालाई याङ्गुन अन्तर्राष्ट्रिय विमानस्थलमा याङ्गुन क्षेत्रका विदेशमन्त्री यु न्यान टुन यु, विदेश मन्त्रालयका पदाधिकारी तथा नेपाली दूतावासका तृतीय सचिव श्रीकृष्ण थापालगायतले स्वागत गरेका थिए ।
प्रधानमन्त्री नेतृत्वको नेपाली प्रतिनिधिमण्डल पनि विशेष विमानबाटै यहाँ आएको हो । त्यसअघि नेपिटमा केन्द्रीय सरकारका मन्त्री तथा विदेश मन्त्रालयका पदाधिकारीले प्रधानमन्त्रीलाई बिदाई गरेको थियो ।
प्रधानमन्त्री कोइराला साँझ थाइल्याण्डको राजधानी बैंकक हुँदै भोलि अपराह्न स्वदेश फर्कने कार्यक्रम छ । प्रधानमन्त्रीका साथ परराष्ट्रमन्त्री महेन्द्रबहादुर पाण्डेलगायत नेपाली टोली पनि भोलि नै स्वदेश आउने छ ।
