- शनिबार, ८ वैशाख, २०८१
चितवन, २ फागुन– दक्षिण चितवनको माडीस्थित गर्दीको वडा नं १ अमिलियामा हात्ती आतंक बढ्दै गएपछि स्थानीयवासी गाउँ छाड्न थालेका छन् ।
घरमा सुतिरहेकै बेला हात्तीले आक्रमण गरेर मानिसको ज्यान लिन थालेपछि स्थानीयवासी त्रासले गाउँ छाड्न थालेका हुन् ।
कतिपयले गाउँ छाडेका छन् भने कतिपय नजिकको स्कुलमा बास परेको समाजसेवी ईश्वरी ढकालले बताउनुभयो । उनीहरु अहिले छिमेकी गाउँ भैरवपुरमा आएर बसेको स्थानीयवासीले बताएका छन् ।
गत माघ २२ गते स्थानीय ४५ वर्षीय शेरबहादुर दर्जीको हात्तीले ज्यान लिएपछि स्थानीयमा त्रास छाएको थियो । अहिले दैनिक गाउँमा हात्ती पसेर आक्रमण गर्ने र लगाएको तथा थन्क्याएको बालीनाली नष्ट गर्न थालेपछि त्रासले स्थानीयले गाउँ छाडेको ढकालले जानकारी दिए ।
प्रायः रातिको समयमा चितवन निकुञ्जबाट हात्ती वस्तीमा आउने गरेकाले राति गाउँमा बस्न नसकिएको पीडितले बताएका छन् ।
चितवन निकुञ्जलाई पटकपटक हात्ती नियन्त्रणका लागि आग्रह गरिएको भएपनि माग सुनुवाइ नभएको भन्दै उनीहरुले आक्रोश पोखेका छन् । माडीको गर्दी अमिलिया चितवन निकुञ्जसँग जोडिएको वडा हो । यहाँ दुई दर्जन घर रहेको छ ।
चितवनमा गत साउनदेखि अहिलेसम्म वन्यजन्तुको आक्रमणबाट सातजनाको ज्यान गइसकेको छ । रासस
