म्यादी प्रहरीमा भर्ना हुन आएकी महिलालाई बलात्कार गरेको अभियोगमा तीन पक्राउ

सप्तरी, ३१ असोज–म्यादी प्रहरीमा भर्ना हुन आएकी एक महिलालाई बलात्कार गरेको अभियोगमा पक्राउ परेका तीन जनालाई जिल्ला प्रहरी कार्यालय सप्तरीले राजविराजमा सार्वजनिक गरेको छ ।
पच्चीस वर्षीया ती महिलालाई सप्तरीको रुपनगर–९ निवासी २३ वर्षीय बालेश्वर यादव, सोही गाविस–८ निवासी २४ वर्षीय राजेश्वर सरदार र बदगामा–३ निवासी २४ वर्षीय राजनारायण यादवले बलात्कार गरेको प्रहरीले जानकारी दिएको छ ।
तीनै जनाले म्यादी प्रहरी भर्नाका लागि आएकी २५ वर्षीय ती महिलालाई गत बुधबार राति राजविराज नगरपालिका–१ स्थित नेपाल टेलिकमको कार्यालय परिसरमा बलात्कार गरेको प्रहरी नायब उपरीक्षक श्यामसिंह चौधरीले जानकारी दिए ।
राति १० बजे टेलिकम कार्यालय परिसरबाट रुँदै निस्किएकी पीडितलाई म्यादी प्रहरी भर्नाको परिणाम टाँस्न जिल्ला प्रशासन कार्यालय पुगेका सई श्याम सुवेदीको प्रहरी टोली र स्थानीयवासीले सोधपुछ गर्दा पीडितले आफू बलात्कृत भएको बताएकी थिइन् ।
म्यादी प्रहरीमा भर्ना हुन आएकी ती महिलालाई होटल वा लजमा बस्न नदिई टेलिकमको कार्यालयमा ल्याई बलात्कार गरिएको पीडितद्वारा बिहीबार प्रहरीमा दिइएको उजुरीमा उल्लिखित छ ।
पीडित महिलाले उजुरी दिएपछि बलात्कारको आरोपमा प्रहरीले बिहीबार राजेश्वर, राजनारायण र बालेश्वरलाई गिरफ्तार गरी जिल्ला प्रहरी कार्यालयको नियन्त्रणमा राखेको थियो ।
यसैगरी राजविराज नगरपालिका–३ निवासी एक नाबालिकालाई बलात्कार गरेको अभियोगमा ४५ वर्षीयलाई प्रहरीले नियन्त्रणमा लिएको छ ।
गत बिहीबार दिउँसो ८ वर्षीया बालिकालाई बलात्कार गरेको अभियोगमा प्रहरीले सप्तरीको बभनगामाकट्टी–३ निवासी ४५ वर्षीय फुलेश्वर शर्मालाई पक्राउ गरेको जनाएको छ ।