- मंगलबार, २३ असार, २०८३
महोत्तरी, ५ पुस–महोत्तरीको जिल्ला अस्पताल जलेश्वरमा अहिले उपचारका लागि आउने ७५ प्रतिशत बिरामी जाडोबाट प्रभावित रहने गरेका छन् ।
जिल्ला अस्पताल जलेश्वरका डा सञ्जयकुमार यादवका अनुसार यस अस्पतालमा दैनिक उपचारका लागि आउने करिब दुई सय बिरामीमध्ये ७५ प्रतिशत बिरामी जाडोबाट प्रभावित रहने गरेका हुन्छन् ।
डा यादवका अनुसार उपचारका लागि आउने दुई सय बिरामीमध्ये एक सय ५० जना बिरामी रुघाखोकी, निमोनिया, कोल्ड फिवर, टाइफाइड र झाडापखालाबाट प्रभावित रहने गरेका छन् ।
केही दिनदेखि जिल्लामा चलेको शीतलहर र चिसो हावाले जनजीवन प्रभावित भई बिरामीको सङ्ख्यामा निक्कै वृद्धि भएको छ भने बढी सङ्ख्यामा बालबालिका र वृद्धवृद्धा प्रभावित भई जिल्ला अस्पतालमा उपचारका लागि आउने गरेको डा यादवले बताए ।
त्यस्तै, जिल्लाका अन्य स्वास्थ्यचौकी, उपस्वास्थ्य चौकी तथा स्वास्थ्य संस्था पनि अहिले जाडोबाट प्रभावित बिरामीको चाप बढेको चिकित्सकले बताएका छन् । रासस
