निर्वाचन प्रमुखलाई मार्ने धम्की

कोलम्बो–मालद्वीपका निर्वाचन आयुक्त फुवाद थोवफिकले सर्वोच्च अदालतले यस साताको अन्त्यमा हुने भनिएको राष्ट्रपति पदको निर्वाचन स्थगन गरेपछि मुलुकमा देखिएको राजनीतिक समस्याबीच आफूले ज्यानमार्ने धम्की पाउन थालेको सोमबार बताएका छन् ।
सर्वोच्च अदालतले निर्वाचन स्थगन गर्न दिएको आदेश नमान्दै आयुक्त थोवफिकले शनिबार निर्वाचन कार्यक्रम अगाडि बढाउने तयारी गरेका थिए र यसपछि निर्वाचन रोक्न सेनालाई आदेश दिइएकाले उनी पछि हट्न बाध्य भए । थोवफिकले आफूलाई ज्यान मार्ने धम्की आएको जानकारी प्रहरीलाई दिएको बताए । उनले स्थानीय नम्बरबाट उक्त धम्की आएको र धम्की आफू, आफ्ना परिवार तथा आफ्ना कर्मचारीविरुद्ध आएको बताए । शनिबारको निर्वाचन पूर्व राष्ट्रपति मोहमद नसीद तथा पूर्व निरङ्कुश राष्ट्रपति मौमुन अब्दुल गयुमका भाइ अब्दुल्लाह यामिनबीच हुने तय भएको थियो । पूर्व राष्ट्रपति गयुमले सन् २००८ सम्म तीन दशक यस मुलुकमा शासन चलाएका थिए ।
सेप्टेम्बर ७ मा भएको पहिलो चरणको निर्वाचनमा नसीदले ४५.४५ प्रतिशत मत प्राप्त गरेका थिए । उनले अदालतको आदेश आफूलाई शासनमा फर्कन नदिन एक षडयन्त्र भएको दाबी गरेका छन् । उनी डेढ वर्ष शासन गरेपछि प्रहरीको विद्रोहमा पदच्युत भएका थिए । निर्वाचनमा धाँधली भएको भन्ने गुनासोमा सुनुवाई नभएसम्म सर्वोच्च अदालतले दोस्रो चरणको निर्वाचन स्थगन गरेको छ । यसका लागि तेस्रो थान प्राप्त गरेका उम्मेदवार गासिम इब्राहिमले मुद्दा दायर गरेका थिए । इब्राहिम तीन लाख ५० हजार सुन्नी मुसलमान बसोबास गर्ने मुलुकको सबैभन्दा धनी व्यक्तिमध्ये एक हुन् । पहिलो चरणको निर्वाचन निष्पक्ष भएको सुपरिवेक्षकहरूले बताएपछि संयुक्त राष्ट्रसङ्घ, अमेरिका, बेलायत, भारत तथा युरोपेली महासङ्घले राष्ट्रपति पदको निर्वाचनको प्रक्रिया ढिलो नगरिकनै सम्पन्न गर्न आग्रह गरेका छन् । रासस÷एएफपी