- आइतबार, १० साउन, २०८३
रुपन्देही- आफूलाई प्रहरीको घुमुवा परिचय दिँदै सर्वसाधारणसँग रकम असुल्न खोज्ने एक व्यक्तिलाई रुपन्देही प्रहरीले पक्राउ गरेको छ ।
जिल्ला प्रहरी कार्यालय रुपन्देहीको टोलीले सिद्धार्थनगर नगरपालिका–१३ निवासी ४९ वर्षीय राकेश प्रताप राणालाई नियन्त्रणमा लिएको हो ।
प्रहरीका अनुसार उनी ओमसतिया गाउँपालिका–४ बालापुरमा डेरा गरी बस्दै आएका थिए ।
प्रहरीको प्रारम्भिक अनुसन्धानअनुसार राणाले सिद्धार्थनगर–१३ शान्तिनगर क्षेत्रमा एक स्थानीयलाई आफू प्रहरीको गोप्य टोलीमा कार्यरत रहेको भन्दै धम्क्याएर १० हजार रुपैयाँ मागिरहेका थिए ।
त्यसबारे सूचना प्राप्त भएपछि खटिएको प्रहरी टोलीले उनलाई घटनास्थलबाटै पक्राउ गरेको हो ।
जिल्ला प्रहरी कार्यालय रुपन्देहीका सूचना अधिकारी प्रहरी नायव उपरीक्षक कृष्णकुमार चन्दका अनुसार पक्राउपछि राणाले बस्दै आएको कोठामा गरिएको खानतलासीका क्रममा एउटा नक्कली पेस्तोल र करिब ५ सय ग्राम गाँजा बरामद भएको छ ।
प्रहरीले राणालाई हिरासतमा राखी ठगीको प्रयास, लागूऔषध र अन्य सम्भावित कसुरका कोणबाट थप अनुसन्धान अघि बढाएको जनाएको छ।
