- बुधबार, २४ असार, २०८३
काठमाडौं- नक्कली भुटानी शरणार्थी प्रकरणमा काठमाडौं जिल्ला अदालतले पूर्वगृहमन्त्री रामबहादुर थापा ‘बादल’ का छोरा प्रतीक थापा र पूर्वउपप्रधानमन्त्री टोपबहादुर रायमाझीका छोरा सन्दीप रायमाझीलाई आरोपबाट सफाइ दिएको छ ।
उनीहरूसहित सात जना अभियुक्तलाई अदालतले निर्दोष ठहर गरेको हो ।
न्यायाधीश तेजबहादुर खड्काको इजलासले मंगलबार सुनाएको फैसलाअनुसार प्रतीक र सन्दीपविरुद्ध दायर अभियोग पुष्टि हुन नसकेपछि सफाइ दिइएको हो ।
उनीहरूसँगै रामशरण केसी, टंककुमार गुरुङ, लक्ष्मी महर्जन, केशव तुलाधर र आशिष बुढाथोकी पनि आरोपबाट मुक्त भएका छन् ।
यही प्रकरणमा अदालतले एमाले नेता तथा पूर्वउपप्रधानमन्त्री टोपबहादुर रायमाझी, नेपाली कांग्रेसका नेता तथा पूर्वगृहमन्त्री बालकृष्ण खाँण, पूर्वगृहसचिव टेकनारायण पाण्डेसहित २३ जनालाई विभिन्न कसुरमा दोषी ठहर गरेको छ ।
फैसलाअनुसार रायमाझी राज्यविरुद्धको कसुर, ठगी तथा संगठित अपराधमा दोषी ठहर भएका छन् भने खाँणलाई ती कसुरमा मतियार ठहर गरिएको छ ।
पूर्वगृहसचिव पाण्डेलाई ठगी, संगठित अपराध र राज्यविरुद्धको कसुरमा दोषी ठहर गरिएको अदालतको फैसलामा उल्लेख छ ।
यस्तै, भुटानी शरणार्थी नेता टेकनाथ रिजाल तथा यस प्रकरणका मुख्य योजनाकारका रूपमा अभियोग लागेका सानु भण्डारी र केशव दुलाल पनि विभिन्न कसुरमा दोषी ठहर भएका छन् ।
अदालतले दोषी ठहर भएका प्रतिवादीहरूको सजाय निर्धारणका लागि असार २९ गते पेसी तोकेको छ ।
सरकारी वकिलको कार्यालयले २०८० जेठ १० गते ३० जनाविरुद्ध ठगी, सरकारी लिखत किर्ते, राज्यविरुद्धको अपराध, संगठित अपराध तथा एकीकृत कसुरमा सजायको माग गर्दै मुद्दा दायर गरेको थियो ।
