- आइतबार, ७ असार, २०८३
काठमाण्डू, ७ असार– सत्ता घटक दल राष्ट्रिय स्वतन्त्र पार्टी (रास्वपा)को आज (आइतबार) बाट चितवनमा सुरु हुने महाधिवेशन उदघाटनस्थलमा कालो ड्रेस लगाएका युवाहरु पनि खटिएको देखिन्छ ।
तलदेखि माथिसम्म कालो ड्रेस र कालै चस्मा लगाएका हट्टाकट्टा युवाहरु देख्दा जोसुकैलाई कोहोलान् भन्ने चासो लाग्न सक्छ । उनीहरु खासमा चितवनकै एक निजी सेक्युरिटी गार्ड कम्पनीका युवाहरु हुन् ।
उनीहरुलाई ‘गढी सेक्युरिटी’ कम्पनीले रास्वपा महाधिवेशन स्थलमा परिचालन गरेको हो । भरतपुरका बालमन्दिरस्थित गढी सेक्युरिटी कम्पनीका मार्केटिङ म्यानेजर राजेन्द्र गोलेले बाउन्सरसहित १०० जनाको टोलीलाई महाधिवेशनस्थल वरपर खटाइएको जानकारी दिएका छन ।
रास्वपाको पहिलो महाधिवेशन उदघाटन जिल्ला प्रहरी कार्यालय नजिकको गेष्टहाउस चौरमा हुँदैछ । यसैगरी पार्किङका लागि पारस बसपार्क, मैयादेवी कलेज र विशाल चोकमा तोकिएको छ ।
गढी सेक्युरिटीले चितवनमा आयोजना हुने विभिन्न सभा समारोह, महोत्सव लगायतका कार्यक्रममा पनि आफ्ना युवा टोलीलाई खटाउँदै आएको छ ।
