- बिहीबार, ७ साउन, २०८३
काठमाण्डू, १९ जेठ– कांग्रेस राष्ट्रिय सभाका सचेतक पदमबहादुर परियारले प्रधानमन्त्री बालेन्द्र साहले ‘नेपालले पनि भारतको धेरै ठाउँ मिचेको छ’ भनी दिएको अभिव्यक्तिबारे माफी नमागेसम्म संसद बैठक चल्न नदिने चेतावनी दिएका छन ।
आज (मंगलबार) बसेको राष्ट्रिय सभा बैठक सुरु हुनासाथ विशेष समय लिएर बोल्दै उनले प्रधानमन्त्रीको उक्त अभिव्यक्ति घोर आपत्तिजनक र निन्दनीय रहेको बताए । उनले प्रधानमन्त्री साहले संसदमा आएर माफी नमागेसम्म बैठक अगाडि बढाउन नदिने समेत बताए ।
सचेतक परियारले प्रधानमन्त्री साहको कुटनीति र राजनीति सम्बन्धी सामान्य ज्ञान समेत नभएको कुरा यो अभिव्यक्तिले छताछुल्ल पारेको जिकिर गरे। प्रधानमन्त्रीको यस्तो गैरजिम्मेवारपूर्ण र गन्तव्यहीन विचार कांग्रेसका लागि कुनै पनि हालतमा स्वीकार्य नहुने अडान समेत दोहोराए ।
उनले लिम्पियाधुरा, लिपुलेक र कालापानीसहित नेपालको करिब ३७२ वर्ग किलोमिटर भूभाग भारतद्वारा अतिक्रमण भएको कुरा सबैलाई थाहा भएको अवस्थामा सरकार प्रमुखकै तर्फबाट नेपालले भारतीय भूमि मिचेको भनी स्वीकारोक्ति आउनु राष्ट्रघाती भएको आरोप लगाए।
