सबै काण्डको छानबिन हुन्छ, प्रतिशोध नभई हिसाब हुन्छः रवि

काठमाण्डू, १२ फागुन– पूर्व उपप्रधान एवं गृहमन्त्री समेत रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले ०४६ यताका सबै भ्रष्टाचार काण्डको छानबिन हुने बताएका छन ।

आज (मंगलबार) इटहरीमा आयोजित चुनावी सभालाई सम्बोधन गर्दै लामिछानेले यस्तो बताएका छन । ‘०४६ सालपछिका सबै काण्डको छानबिन हुन्छ,’ लामिछानेले भने, ‘प्रतिशोध हुँदैन हिसाब हुन्छ ।’

लघुवित्त, सहकारी लगायतका समस्यामाथि पनि छानबिन हुने उनले बताए । ‘जति पनि लघुवित्त, सहकारी लगायतका जति पनि समाधान निकाल्न नसकेर आरोपमाथि आरोप लगाएर, यसलाई समस्याग्रस्त बनाएर राख्ने तर समाधान गर्न नसक्नेहरूलाई यहीबाट भन्न चाहन्छु–रवि लामिछानेलाई थुन्नबाहेक कुनै मान्छेले एक रुपैयाँ पायो रु पाएन,’ उनले भने ।

आरोप आफूलाई लगाए पनि रास्वपाको सरकारले १०० दिनभित्र साना बचतकर्ताको पैसा फिर्ता दिन सुरु गर्ने उनले दाबी गरे ।