- शुक्रबार, १ साउन, २०८३
काठमाण्डु, ७ मंसिर– एमालेका महासचिव शंकर पोखरेलले चीनबाट ऋण लिन सकिने बताएका छन् ।
सामाजिक सञ्जालमार्फत शुक्रबार उनले छिमेकीबाट ऋण लिनु हुँदैन भन्ने गलत भएको टिप्पणी गरे ।
प्रधानमन्त्री केपी ओली आगामी १७ देखि २० मंसिरसम्म चीन भ्रमणमा जाँदैछन् ।
त्यस क्रममा ओली ‘बेल्ट एण्ड रोड इनिसिएटिभ’ (बीआरआई) अन्तर्गतका परियोजानामा हस्ताक्षर गर्ने तयारीमा छन् । तर, प्रमुख सत्तारुढ घटक काँग्रेसले ओलीलाई त्यसो नगर्न बदाब दिँदै आएको छ ।
ऋणमा नभई अनुदानमा मात्र बीआरआई परियोजना अघि बढाउन सकिने काँग्रेसको अडान छ ।
पोखरेलले काँग्रेसतर्फ संकेत गर्दै प्रश्न गरेका छन्, ‘नेपालको विकासका लागि छिमेकी मित्र राष्ट्रहरूबाट सहुलितपूर्ण ऋण सहायता लिनु के गलत हो ?’
पोखरेलले नेपाललाई भूपरिवेष्ठित मुलुकबाट भू-जडित मुलुकमा बदल्न उत्तरी छिमेकी चीनसँग व्यापार र पारवाहन सम्झौता गर्नु गलत नभएको उल्लेख गरेका छन् ।
काम गर्नेलाई हौसला दिन, कमजोरी भए सुझाव दिन, विकल्प भए विकल्प दिन भन्दै उनले अस्थिरता सिर्जना गर्ने उद्देश्य अनुरूप प्रायोजित रुपमा सिर्जित षडयन्त्र र भ्रमबाट समाज र राजनीतिलाई मुक्त गर्न अपिल गेरका छन् ।
‘काम गर्नेलाई हौसला देऊ । कमी कमजोरी भए सुझाव देऊ । विकल्प भए विकल्प देऊ । अस्थिरता सिर्जना गर्ने उद्देश्य अनुरूप प्रायोजित रुपमा सिर्जित षडयन्त्र र भ्रमबाट समाज र राजनीतिलाई मुक्त गरौं’, पोखरेलले लेखेका छन् ।
