रवि लामिछानेलाई आज अदालतमा उपस्थित गराइँदै

काठमाण्डु, ४ कात्तिक– सहकारी ठगी र संगठित अपराध आरोपको छानबिनका लागि पक्राउ परेका राष्ट्रिय स्वतन्त्र पार्टी (रास्वपा) सभापति रवि लामिछानेलाई आज अदालतमा उपस्थित गराइँदैछ ।

कास्की प्रहरीले म्याद थपका लागि कास्की जिल्ला अदालतमा प्रस्तुत गर्न लागेको हो ।

प्रहरीको केन्द्रीय अनुसन्धान ब्युरो (सिआईबी) ले लामिछानेलाई शुक्रबार साँझ बनस्थलीस्थित रास्वपा केन्द्रीय कार्यालयबाट पक्राउ गरी राति नै पोखरा लगेको थियो ।

शनिबार सार्वजनिक बिदाका कारण अदालत बन्द रहेकाले प्रहरीले लामिछानेलाई आज मात्र अदालतमा उपस्थित गराउन लागेको हो ।

कास्की जिल्ला अदालतले सहकारी ठगी र संगठित अपराध कसुरमा अनसुन्धानका लागि लामिछानेलाई पक्रन शुक्रबार पक्राउ पुर्जी जारी गरेको थियो ।

अदालतले म्याद थप गरेपछि लामिछानेसँग बयान लिएर अनुसन्धान अघि बढाइने कास्की प्रहरी प्रमुख एसपी श्यामबाबु ओलियाले जानकारी दिए ।

प्रहरीले छानबिन प्रतिवेदन बुझाएपछि जिल्ला सरकारी वकिल कार्यालयले अदालतमा मुद्दा दायर गर्छ । त्यसपछि अदालतले पुर्पक्षका लागि थुनामा पठाउने वा बाहिरै राखेर मुद्ध लड्न दिने भन्ने विषयमा थुनछेक बहस हुनेछ ।

पुर्पक्षका लागि थुनामा पठाइएको अवस्थामा मात्र लामिछानेको सांसद पद निलम्बनमा पर्नेछ ।