- सोमबार, ११ साउन, २०८३
काठमाण्डु, १९ असार– नेकपा माओवादी केन्द्रका महासचिव देव गुरुङले कांग्रेस र नेकपा एमालेबिच मध्य रातमा भएको गठबन्धन पश्चगामी भएको बताएका छन् ।
आज (बुधबार) संवाद डबलीले गरेको कार्यक्रममा बोल्दै गुरुङले यस्तो बताएका हुन । उनले जनयुद्ध र जनआन्दोलनबाट प्राप्त उपलब्धिलाई उल्टाउन संविधान संशोधन गर्ने कुरा आएको पनि बताएका छन ।
गुरुङले भने, ‘संविधानको जग वृहत् शान्ति सम्झौता हो, वृहत् शान्ति सम्झौताको जग जनयुद्ध र जनआन्दोलन हो । मध्यरात षड्यन्त्रमूलक ढङ्गबाट संविधान संशोधनको सहमति गरेर उपलब्धिलाई नै उल्टाउँदै २०४७ सालको संविधान फर्काउन लागेको हो त होइन भन्ने गम्भीर प्रश्न उठेको छ ।’
उनले राष्ट्रिय सहमतिका आधारमा संविधान संशोधन हुन सक्ने तर पछि फर्किने गरी दुई दलबिच भएको सहमतिले देशमा द्वन्द्व निम्त्याउने पनि बताएका छन ।
महासचिव गुरुङले प्रधानमन्त्री प्रचण्डले राजीनामा नलिने पनि बताएका छन । उनले नेपालको संविधानको धारा ७६ (२) अनुसार प्रधानमन्त्रीले विश्वासको मत माग्ने र विश्वासको मत नपाएपछि सोही धाराको (३) अनुसार सरकार गठनको प्रक्रिया सुरु हुने पनि बताएका छन ।
गुरुङले कोशी सरकार गठनमा सर्वोच्चले गरेको व्याख्या यहाँ मेल नखाने समेत दाबी गरेका छन । महासचिव गुरुङले एमालेले अहिले नै समीकरण छोड्नुपर्ने कुनै कारण नभएको बताएका छन ।
उनले आन्तरिक रूपमा झिना मसिना कुरा भए पनि काँग्रेससँग गठबन्धन गर्नुपर्ने कारण आफ्नो पार्टीले नदेखेको दाबी गरेका छन ।
