क्यान्सर पुष्टि भएपछि प्रधानमन्त्रीको रेडियो थेरापी हुने

काठमाण्डु, १३ असार– अमेरिकामा उपचार गराइरहेका प्रधानमन्त्री सुशील कोइरालाको फोक्सोमा देखिएको सेतो दाग क्यान्सर भएको पुष्टि भएपछि आजदेखि रेडियो थेरापीबाट उपचार सुरु गरिने भएको छ ।
प्रधानमन्त्रीसँगै रहेका वरिष्ठ छाती रोग विषेशज्ञ डा. करवीरनाथ योगीले चिकित्सकहरुसँग सल्लाह गरी रेडियो डेराथीबाट उपचार गराउन लागिएको जानकारी दिएका छन् । उनका अनुसार क्यान्सरको शल्यक्रिया गर्नुपर्ने भए पनि दमको रोगी भएकाले रेडेयोथेरापी विधिबाट उपचार गर्न लागिएको हो ।
फोक्सोमा क्यान्सर भएको पुष्टि भएपछि प्रधानमन्त्री कोइराला अझै दुई साताभन्दा बढी अमेरिका बस्नुपर्ने देखिएको छ । प्रधानमन्त्रीको न्यूयोर्कस्थित मेमोरियल स्लोन केटरिङ क्यान्सर सेन्टरमा उपचार भइरहेको छ । सात वर्षअघि पनि उनको जिब्रोको क्यान्सरको उपचार सोही अस्पतालमा भएको थियो ।