- शुक्रबार, २० असार, २०८२
काठमाण्डु, २७ जेठ – शनिबार माथिल्लो कर्णाली जलविद्युत आयोजनामा भएको बम विष्फोटको जिम्मा नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले लिएको छ ।
नेकपाको सेती महाकाली ब्युरोले आइतबार एक विज्ञप्ति प्रकाशित गर्दै जनताको हित र चहानाविपरीत भारतीय कम्पनीलाई जलविद्युत आयोजाको काम सुम्पेको भन्दै जनताले त्यसको प्रतिकार गरेको बताएको छ ।
नेकपाले बारम्बार नेपालले नै सो आयोजना बनाउनुपर्ने बताउँदै आए पनि सरकारले त्यसको बेवास्था गर्दै भारतीय कम्पनीलाई सम्पेको आरोप विज्ञप्तिमा लागइएको छ ।
‘परियोजनाको माथिल्लो र तल्लो तटको पुरै क्षेत्रमा जीएमआर कम्पनीको अनुमति बेगर कसैले पनि बिद्युत उत्पादन तथा कुनै आयोजना सञ्चालन गर्न नपाईने जस्ता राष्ट्रघाती सम्झौता गरिएको हुनाले सुरुवातदेखि नै हामीले विरोध गर्दै आएका थियौ’, सेती महाकाली ब्युरो इन्चार्ज निर्माणद्वारा जारी विज्ञप्तिमा भनिएको छ, ‘ पावरहाउसको तल्लो तटमा पर्ने बाँके र बर्दीयालगायतका जिल्लाहरुमा हिँउदमा सुख्खा हुने र वर्षायाममा बाढी पहिरोले गम्भीर क्षति पुर्याउने र पर्यावरणमा नकारात्मक परिणाम निम्त्याउने निश्चित हुँदाहुँदै सरकारले सोही कम्पनीलाई परियोजना सुम्पिएर राष्ट्घाती कदम जारी राखेकाले चेतावनी स्वरुप अछामको तुर्माखाद गाउँपालिका ३ भैरवस्थानमा रहेको परियोजनाको सम्पर्क कार्यालयमा शनिबार बिहान हाम्रो पार्टीको नेतृत्वमा जनस्तरबाट उक्त कारबाही गरिएको जानकारी गराउछौ ।’
अछामको तुर्माखाद गाउँपालिका ३ भैरवस्थानमा रहेको परियोजनाको सम्पर्क कार्यालयमा शनिबार बिहान प्रेसर कुकर बम विष्फोट भएको थियो ।
बिस्फोटबाट जलविद्युत परियोजनाको कार्यालय र नजिकैको शौचालय पुर्णरुपमा ध्वस्त भएको छ भने एउटा मोटरसाइकलमा समेत आगजनी भएको छ ।
