- बुधबार, १८ असार, २०८२
काठमाण्डु, २१ जेठ – राष्ट्रिय जनता पार्टी(राजपा)का नेता राजेन्द्र महतोले संघीयता विरोध बजेट आएको बताएका छन् ।
मंगलबार बजेटमाथि संसदमा भएको छलफलमा भाग लिँदै उनले संघीयताको मर्मअनुसार बजेट नआएको बताए । ‘संघीयता विरोधी यसको सबैभन्दा ठूलो विशेषता हो’ उनले भने, ‘केन्द्रीय सरकारले सबै बजेट चलाउने रे । प्रान्तीय सरकारहरुले २० प्रतिशत पनि बजेट नपाउने रे ।’
आफूहरुले ‘केपी ओली मार्का’को नभई स्वायत्त, अधिकार सम्पन्न प्रदेश मागेको उनको भनाइ थियो ।
विदेश नीति, राष्ट्रिय सुरक्षा, मौद्रिक र राष्ट्रिय गौरबका आयोजना बाहेक सबै प्रदेशलाई दिनुपर्ने भन्दै उनले भने, ‘संघीयतालाई असफल पार्ने बजेट आएको छ, यो दुःखद हो । ‘
महतोले स्थानीय तहमा कर्मचारी भर्ना गर्न लोकसेवा आयोगले गरेको विज्ञापनको विरोध गरे । महतोले सरकार संविधानलाई असफल पार्नेतर्फ उद्यत भइरहेको आरोप लगाए ।
‘प्राप्त उपलब्धी पनि पालैपालो खोस्ने काम भएको छ । कर्मचारी भर्ती गर्दा समावेशी नगर्ने रे,’ लोकसेवा आयोगप्रति आक्रोश व्यक्त गर्दै महतोले भने, ‘दादा गिरी नगर्नुस्, केपी ओली प्रवृत्ति छोड्नुस् ।’
सांसद महताले सांसदलाई दिएको ६ करोडको विरोध भइरहेको भन्दै निर्वाचन प्रणाली नै फेर्न प्रस्ताव गरे ।
‘संसदहरु चुनावमा जाँदा धर्मसाला बनाइदे, हृयाण्डपाइप माग्दो रहेछ । सांसद भएपनि माग्दो रहेछ’ उनले भने, ‘निर्वाचन प्रणाली नै यस्तै हो । समानुपातिकमा लैजाउँ न ।’
