- सोमबार, ८ असार, २०८३
काठमाण्डू, ८ असार– फिफा विश्वकप २०२६ अन्तर्गत आज (सोमबार) राति अर्जेन्टिनाका लियोनेल मेस्सी र फ्रान्सका केलियन एम्बाप्पे एकसाथ देखिनेछन् ।
अर्जेन्टिनाको अस्ट्रियाविरुद्धको खेल डलास स्टेडियममा राति १०ः४५ बजे सुरु हुनेछ । अघिल्लो खेलमा ह्याट्रिक गरेका मेस्सीले अर्को प्रभावशाली प्रदर्शन गर्ने अपेक्षा गरिएको छ। फ्रान्स र इराक बीचको दोस्रो खेल बिहान २ः ४५ बजे फिलाडेल्फिया रंगशालामा हुनेछ। नर्वे र सेनेगल मंगलबार बिहान ५ः ४५ बजे खेल्नेछन् भने जोर्डन र अल्जेरिया बिहान ८ः ३० बजे खेल्नेछन्। च्याम्पियन अर्जेन्टिना लगातार दोस्रो जितको लक्ष्यमा रहेको छ ।
डिफेन्डिङ च्याम्पियन अर्जेन्टिनाले समूह जे मा अस्ट्रियाको सामना गर्नेछ। उनीहरूले दुई मैत्रीपूर्ण खेल खेलेका छन् । अर्जेन्टिनाले १९८० को खेल ५–१ ले जितेको थियो भने १९९० को खेल १–१ को बराबरीमा सकिएको थियो। लियोनेल मेस्सीको ह्याट्रिकको मद्दतले अर्जेन्टिनाले प्रतियोगिताको उद्घाटन खेलमा अल्जेरियालाई ३–० ले पराजित गर्यो भने अस्ट्रियाले जोर्डनलाई ३–१ ले पराजित गरेको थियो ।
अर्जेन्टिनाले कप्तान लियोनेल मेस्सीबाट अर्को गोलको आशा गर्नेछ। रोड्रिगो डे पल र अल्भारेजले पनि राम्रो प्रदर्शन गर्ने प्रयास गर्नेछन् । यसैबीच, स्टार खेलाडीहरू डेभिड अलाबा र मार्सेल सबिट्जर अस्ट्रियाको जितको जिम्मेवारी लिनेछन्। यस्तै समूह आई मा फ्रान्स र इराक पहिलो पटक अन्तर्राष्ट्रिय खेलमा आमनेसामने हुनेछन् ।
फ्रान्सले आफ्नो पहिलो खेलमा सेनेगललाई ३–१ ले हराएर आफ्नो अभियानको बलियो सुरुवात गरेको थियो। यसैबीच, इराक नर्वेसँग १–४ ले पराजित भयो ।
फ्रान्सले कप्तान तथा स्ट्राइकर केलियन एमबाप्पेबाट गोलको आशा गर्नेछ । एमबाप्पे र गोलकिपर माइक मैग्ननको बलियो प्रदर्शनले जित सुनिश्चित गर्न सक्छ । इराकले काउन्टर–आक्रमणमा आफ्ना स्टार फरवार्ड आयमान हुसेनबाट गोलको आशा गर्नेछ ।
