- मंगलबार, १२ साउन, २०८३
काठमाण्डू, १४ फागुन– कांग्रेसको कर्णाली प्रदेशस्तरीय चुनावी सभा अहिले सुर्खेतमा जारी छ । सुर्खेत पूर्व कार्यवाहक सभापति पूर्णबहादुर खड्काको गृहजिल्ला हो ।
कांग्रेसका सभापति गगन थापाले सम्बोधन गर्ने यो सभामा खड्का सहभागी छैनन् । गगनको नेतृत्वमा विशेष महाधिवेशन हुँदा खड्का कार्यवाहक सभापति रहेका थिए ।
निर्वाचन आयोगले पनि गगन नेतृत्वको कार्यसमितिलाई आधिकारिकता दिएपछि खड्का सर्वोच्च अदालतसम्म पुगेका थिए । सर्वोच्चले पनि तत्कालीन सभापति शेरबहादुर देउवाको पक्षमा फैसला नदिएपछि उनी चुनावी अभियानमा हिँडेका छैनन् । आफ्नै गृह प्रदेशमा भएको चुनावी सभामा आज पनि देखिएनन् ।
कार्यक्रमलाई सभापति थापासहित उपसभापति पुष्पा भुसाल, नेताहरू हृदयराम थानी, ललिजङ्ग शाहीलगायत सहभागी छन् । प्रदेशका उपसभापति विष्णुबहादुर पूर्णबहादुरका आफ्नै भाइ हुन् ।
उनी सुर्खेत–१ बाट उम्मेदवार बनेका छन् । सभालाई सम्बोधन गर्दै खड्काले कर्णालीमा पार्टी एक ढिक्का भएको चुनावी मैदानमा होमिएको दाबी गरे ।
कर्णालीका १० ओटै निर्वाचन क्षेत्रमा कांग्रेसप्रति जनलहर आएको जिकिर गर्दै गलत भाष्य बनाइएको उनको भनाइ छ ।
