- बुधबार, २५ असार, २०८२
झापा, २५ असार– झापामा मोटरसाइकल र स्कुटर ठोक्किँदा दुई जनाको ज्यान गएको छ ।
बाह्रदशी गाउँपालिका–१ खयरबारीस्थित भित्री सडक खण्डमा बी आर ३७ ए जेड ६४४० नम्बरको भारतीय मोटरसाइकल र विपरीत दिशामा रहेको प्र१–०१–०१६प ९२७० स्कुटर बुधबार आपसमा ठोक्किएर दुर्घटना भएको प्रहरीले जनाएको छ ।
दुर्घटनामा स्कुटर चालक कचनकवल गाउँपालिका–३ का ६० वर्षीय श्रीप्रसाद राजवंशी र परिचय खुल्न बाँकी रहेका मोटरसाइकल चालकको मृत्यु भएको हो ।
गम्भीर घाइते उनीहरुको प्रादेशिक अस्पताल भद्रपुरमा उपचारका क्रममा ज्यान गएको हो ।
स्कुटरमा सवार मृतक राजवंशीकी बुहारी २७ वर्षीया उर्मिला र उनका छोरा तीन वर्षीय आयुष राजवंशी घाइते भएका छन् । उनीहरुको अवस्था गम्भीर छ । उनीहरूको बी एण्ड सी अस्पताल बिर्तामोडमा उपचार भइरहेको छ । प्रहरीले घटनाबारे अनुसन्धान गरिरहेको छ ।
