- शनिबार, २० वैशाख, २०८२
संखुवासभा, २० वैशाख — संखुवासभाको तुम्लिङटार अहिले एउटा अमानवीय घटनाले स्तब्ध छ । एउटा सामान्य गाउँघरको झगडाले त्यस्तो मोड लियो, जसले एउटै घरभित्र हत्या गराउन सक्ने हदसम्मको कटुता जन्मायो ।
शनिबार राति ७२ वर्षीय मनबहादुर कुमालको हत्या भयो । हत्या कसैले बाहिरबाट आएर गरेन—उनीमाथि मृत्युको छायाँ आफ्नै घरपरिवारबाट खसेको रहेछ । अझ दर्दनाक कुरा के भने, यो योजनाको केन्द्रमा थिइन् — उनीकी बुहारी ।
प्रहरी अनुसन्धानले देखाएको छ ससुराको हत्या आफ्नै बुहारीले गराएकी हुन् । उनी एक्लैले होइन, योजनामा सहभागी थिए दुई जना १७ वर्षीय नाबालक र उनीकी १३ वर्षीया छोरी । योजनाबद्ध रूपमा ती किशोरहरूलाई रातिको समयमा बोलाइयो । जब मनबहादुर सुतिरहेका थिए, नकाव लगाएका किशोरहरू घर पसे र उनको घाँटी थिचेर हत्या गरे ।
मृतकको घरबाट बुहारीको घर झण्डै सय मिटर टाढा पर्छ । प्रहरीका अनुसार हत्या सुतिरहेको अवस्थामा गराइएको हो — बिना प्रतिकार, बिना आवाज ।
जग्गा विवादको शृंखला
यो घटना कुनै क्षणिक रिसको परिणाम थिएन। प्रहरीका अनुसार, जग्गा बेचबिखनको विषयले बिस्तारै यो घटनाको बीउ रोपेको थियो । मृतककी पत्नीको नाममा रहेको जग्गा बिक्री गरेर त्यसबाट फाइदा लिन खोज्दा, बुहारी र ससुरा बीच सम्बन्ध विग्रँदै गएको थियो । बुहारीले बुझिन् — जग्गा बेचियो भने त्यसको हिस्सा आफूले नपाउने । र, त्यही लोभले हिंसाको बाटो रोजियो ।
अझ गहिरो कुरो के छ भने — यो सम्बन्धमा दरार पहिलोपटक आएको थिएन । प्रहरीको अभिलेखअनुसार, २०७१ सालमा मनबहादुरले आफ्नै छोरालाई खुकुरी प्रहार गरेका थिए । त्यो समयदेखि नै परिवारमा तनाव रहेको र सम्बन्ध बिग्रँदै गएको पाइन्छ । अहिले उनका छोरा वैदेशिक रोजगारीमा छन् ।
पैसा र प्रलोभन
प्रहरी अनुसन्धानले देखाएको छ — किशोरहरूलाई २० हजार रुपैयाँ दिने सर्तमा हत्या गर्न लगाइएको थियो । ती किशोर र किशोरी — जिनको जीवन अझै थालनीमै थियो — एक यस्तो खेलमा तानिए, जसको मूल्य उनीहरूले अझ धेरै तिर्नुपर्नेछ ।
स्तब्ध गाउँ, मौन श्रीमती
मनबहादुरको श्रीमती सुनामाया कुमालका अनुसार, घटना रातिको थियो । उनले आफ्ना श्रीमानमाथि आक्रमण भइरहेको महसुस गरिन्, तर ठूलो आवाज ननिस्कने शारीरिक समस्याका कारण उनी चिच्याएर मद्दत माग्न सकिनन् । हत्या पछि उनले छिमेकीहरूलाई खबर गरिन् । मनबहादुरलाई अस्पताल पुर्याइए पनि, चिकित्सकहरूले उनलाई मृत घोषणा गरे ।
अनुसन्धान जारी
जिल्ला प्रहरी कार्यालयले घटनामा संलग्न दुई किशोर, एक किशोरी र योजनाकार बुहारीलाई पक्राउ गरिसकेको छ । नाबालक संलग्नता भएका कारण नाम गोप्य राखिएको छ । संखुवासभा प्रहरी प्रमुख डीएसपी दक्षकुमार बस्नेतका अनुसार अनुसन्धान अझै जारी छ ।
