
काठमाण्डू, १७ वैशाख– पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाल–भारत सीमामा देखिने समस्या समाधानमा पहल गर्ने प्रतिबद्धता व्यक्त गरेका छन ।
आज (बुधबार) तराई–मधेस जागरण अभियानअन्तर्गत बेलौरी पुगेका प्रचण्डले नगरप्रमुख पोतिलाल चौधरीले बुझाएका ज्ञापनपत्र बुझ्दै अध्यक्ष प्रचण्डले यस्तो बताएका हुन ।
उनले समस्या समाधानका लागि पहल गर्ने प्रतिबद्धता जनाएका हुन् । प्रचण्डले भने, ‘यस नगरपालिकामा म यसअघि पनि विभिन्न कार्यक्रमका अवसरमा आएको छु । यहाँका समस्याहरू बारे म जानकार छु।
नेपाल–भारत सीमामा देखिने समस्या, सुकुम्वासी र अव्यवस्थित बसोबासीको समस्या समाधानका लागि म विपक्षी दलको नेताको हैसियतमा गर्न सकिने सबै प्रकारको सहयोग गर्ने प्रतिबद्धता व्यक्त गर्छु ।’
कार्यक्रमको क्रममा बेलौरी नगरपालिकाका प्रमुख पोतिलाल चौधरीले अध्यक्ष प्रचण्ड समक्ष नगरका समस्या र आवश्यकताहरू समेटिएको ज्ञापनपत्र पेस गरेका थिए ।