सहकारी ठगलाई कारबाही गरिएको हो, रास्वपा सक्न खोजेको होइनः एमाले

काठमाण्डू, १७ माघ– पूर्व मन्त्री एवं एमाले उपमहासचिव प्रदीप ज्ञवालीले सरकारले सहकारी ठगलाई कारबाही गर्न खोज्दा गलत तवरले प्रचार गर्न खोजीएको भन्दै आपत्ति व्यक्त गरेका छन ।

आज (बिहीबार) प्रेस चौतारी ललितपुरको जिल्ला अधिवेशन समारोहलाई सम्बोधन गर्दै एमालेका कार्यवहाक महासचिव समेत रहेका नेता ज्ञवालीले यस्तो बताएका हुन । उनले भने, ‘ जो जो सहकारी अनियमिततामा संलग्न छन्, उनीहरूलाई बिन मोलाहिजा कारबाही अगाडि बढाइएको छ, ‘बिचमा राष्ट्रिय स्वतन्त्र पार्टीका साथीहरूले एउटा भाष्य निर्माण गर्ने कोसिस गर्नुभयो, कि यो त रास्वपालाई निषेध गर्न, रास्वपालाई सिद्ध्याउन प्रायोजित गरिएको छ भनेर।’ यसो भनिरहँदा रास्वपाका नेताले वास्तविक तथ्यलाई ढाकछोप गरेको उनले बताएका छन ।

‘रवि लामिछानेजीसँगै कतिपय नेकपा एमालेका मान्छे पनि परेका छन्, कतिपय कांग्रेसका पनि परेका छन्,’ ज्ञवालीले भने । जुन औला विष लाग्छ, त्यही औला काट्नुपर्ने उनले बताएका छन । उनले भने, ‘हामीले कसैको मुख हेर्नुपर्ने जरुरी छैन । गल्ती गरिएको छैन भने डराउनुपर्ने कारणै छैन।’ सरकारले सहकारी क्षेत्रको बेथितिलाई सम्बोधन गर्ने प्रयास गरिरहेको पनि ज्ञवालीले बताए ।

यस क्रममा सरकारले हालसम्म १४ हजार बचतकर्ताहरूको फिर्ता गरेको दाबी ज्ञवालीले दाबी गरे । ६ हजारको पूर्ण रूपले र बाँकी ८ हजारको कसैको ७५ प्रतिशत, कसैको ५० प्रतिशत फिर्ता गरेको उनले बताएका छन ।