रवि लामिछानेलाई पक्रन आएको प्रहरीको प्रतिकार नगर्न रास्वपाको कार्यकर्तालाई निर्देशन

काठमाण्डू, २ कात्तिक- राष्ट्रिय स्वतन्न्त्र पार्टी (रास्वपा) ले सभापति रवि लामिछानेलाई पक्राउ गर्न नेपाल प्रहरीको टोली पार्टी कार्यालय बनस्थली पुगेको कुरा सत्य भएको जनाएको छ ।

कार्बाहक प्रवक्ता मनिष झाले प्रेस नोट जारी गर्दै रास्वपा कार्यालयमा प्रहरी आएको बताए ।

सत्तापक्षले कसैको राजनीति जोगाउन कुण्ठित कदम चालेको र राजनीतिक प्रतिशोध सांधेकोमा आफूहरु स्पष्ट रहेको उल्लेख गरे ।

तर पक्राउ गर्न आएका प्रहरी अधिकारीहरूलाई कुनै किसिमको प्रतिकार र अवरोध नगर्न पार्टी सदस्यहरूलाई अनुरोध गरिएको झाले स्पस्ट गरे ।

केन्द्रीय अनुसन्धान ब्युरो (सिआइबी) र काठमाण्डु उपत्यका अपराध अनुसन्धान कार्यालय टेकुको टोली लामिछानेलाई पक्रन घण्टीघर पुगेको हो ।

जिल्ला अदालत कास्कीले लामिछानेविरूद्ध शुक्रबार पक्राउ पुर्जी जारी गरेको थियो ।

कास्की जिल्ला  अदालतका न्यायाधीश कृष्णजंग शाहको इजलासले लामिछानेलाई पक्राउ गर्न  अनुमति दिएको छ ।

संसदीय छानबिन विशेष समितिले गोर्खा मिडियाका तत्कालीन प्रबन्ध निर्देशक लामिछानेले सहकारीको पैसा अपचलन गरेको निस्कर्षसहित उनीमाथि कारबाही सिफारिस गरेको थियो ।

लामिछानेलाई पक्राउ गर्ने तयारी भएको सूचना पाएपछि शुक्राबार बिहान बसेको विपक्षी दलहरुको बैठकले उनलाई पक्राउ गरे प्रतिकार गर्ने चेतावनी दिएको थियो ।

सभापतिलाई पक्राउ गर्ने तयारीपछि रास्वपाले कार्यकर्तालाई पार्टी केन्द्रीय कार्यालय बनस्थलीमा बोलाएको छ ।