बालेन लक्षित ओलीको टिपप्णी: भैँसीको ढाडमा लात्ती हानेँ भनेर झिँगा दंग पर्छ

काठमाण्डु, २५ जेठ– पूर्व प्रधानमन्त्री एवं एमाले अध्यक्ष केपी शर्मा ओलीले गिरीबन्धुको जग्गा सट्टापट्टामा काठमाण्डु महानरपालिकाका मेयर बालेन्द्र शाह बालनले सामाजिक सञ्जाल फेसबुकबाट केही दिनअघि गरेको टिपप्णीमाथि जबाफ फर्काएका छन ।

चितवनको भरतपुर विमानस्थलमा बिहीबार पत्रकारसँगको कुराकानीमा अध्यक्ष ओलीले जवाफ फर्काएका हुन । अध्यक्ष ओलीले मेयर बालेनको टिप्पणीलाई ‘भैंसीको ढाडमा झिँगाले लात्ती हानेँ भनेर दंग परेजस्तैु भन्ने टिप्पणी गरेका हुन् ।

मेयर बालेनलाई लक्षित गर्दै अध्यक्ष ओलीले भने, ‘भैंसीको ढाडमा झिँगा बस्यो कि के बस्यो, थाहा पनि पाएको हुँदैन, झिँगा दङ्ग परेको हुन्छ, चार लात हानेँ भनेर१ म कसैसँग अनावश्यक ढंगको विवादमा पर्न चाहन्नँ ।’

उनले राष्ट्रिय राजनीतिलाई परिपक्व, जिम्मेवार, सभ्य बनाउनुपर्ने पनि बताएका छन । उनले भने, ‘राष्ट्रिय राजनीतिलाई सम्भ राजनीतिमा लानुपर्छ, असभ्य राजनीतमा लानु हुँदैन ।’

मेयर बालेनले गिरीबन्धु जग्गा प्रकरणमा दस हजार करोडको बदमासी रहेको र त्यसमा अध्यक्ष ओलीको संलग्नता रहेको भन्ने स्टाटस फेसबुकमा पोस्ट गरेका थिए । मेयर बालेनले गिरीबन्धु जग्गा सट्टापट्टा गरिदिन्छौं भनेर लिएको बैना फिर्ता गर्न पनि भनेका थिए ।