- आइतबार, ४ जेठ, २०८२
काठमाण्डु, २२ पुस– पूर्वप्रधानमन्त्री एवं नेपाल समाजवादी पार्टीका अध्यक्ष डा. बाबुराम भट्टराईले गणतन्त्रविरोधी शक्ति राप्रपासँग घाँटी जोड्दा व्यवस्था नै खतरामा पर्न सक्ने भन्दै प्रधानमन्त्री पुष्पकमल दाहाल प्रचण्डलाई सचेत गराएका छन् ।
प्रतिनिधिसभामा १४ सांसद् रहेको राप्रपाले प्रधानमन्त्रीमा प्रचण्डलाई समर्थन गरेको थियो । प्रधानमन्त्रीले २६ पुसमा पद तथा गोपनियताको सपथ लिँदैछन् । तर, राप्रपाले विश्वासको मत दिन र सरकारमा सहभागी हुन २७ पुसमा पृथ्वीजयन्तीका दिन सार्वजनिक बिदा दिनुपर्ने सर्त अघि सारेको छ ।
भट्टराईले गठबन्धन गर्दा लक्ष्मणरेखा पालना नगरिए ठूलो दिर्घकालीन क्षति हुनसक्ने बताए । ‘गठबन्धन गर्दा एउटा लक्ष्मणरेखा पालना गरिएन भने ठूलो दीर्घकालीन क्षति हुन सक्छ,’ ट्वीटमार्फत भट्टराईले भनेका छन्, ‘सरकारको अंकगणितका निम्ति संघीय लोकतान्त्रिक गणतन्त्रविरोधी शक्तिसँग घाँटी जोड्दा संविधान र व्यवस्था नै धरापमा पर्न सक्छ ।’
राप्रपाले राजसंस्था पुनस्र्थापना आफ्नो प्रमुख राजनीतिक लक्ष्य बताउँदै आएको छ । भट्टराईले २०५१ पछि कांग्रेस र एमालेले पालैपालो राप्रपा बोक्दाको दुष्परिणाम नबिर्सन पनि भनेका छ्न ।
