काठमाण्डु, १० मंसिर– दसौँ महाधिवेशन स्थल चितवन आइपुगेका एमाले प्रतिनिधिहरूले केन्द्रीय सदस्यमा उम्मेदवारी घोषणा गर्न थालेका छन् । आकांक्षीहरूले प्रदेश–प्रदेशका प्रतिनिधिमाझ केन्द्रीय सदस्यका लागि लबिङ गरिरहेका छन् ।
पदाधिकारीमा सर्वसम्मत गराउन प्रयास भइरहे पनि केन्द्रीय सदस्यमा भने त्यो प्रयास सफल नहुने देखिएको छ। महाधिवेशनले दुई सय २५ सदस्यीय केन्द्रीय कमिटी चयन गर्नेछ । केन्द्रीय सदस्यमा दोब्बरभन्दा बढी प्रतिनिधि आकांक्षी देखिएका छन् । आकांक्षी बढी भएपछि एमालेले निर्वाचनको तयारी पनि गरेको छ ।
प्रतिनिधिहरूले केन्द्रीय सदस्यमा उम्मेदवारी दिन भित्रभित्रै लबिङ तीव्र पारेका छन् । पार्टी अध्यक्ष केपी शर्मा ओलीले महाधिवेशनमा निर्वाचन भए चिट वितरण हुने भनेपछि नेताहरूले उनको सूचीमा पर्न कसरत गरिरहेका छन् । ‘आकांक्षी धेरैजसो नेताले पार्टी अध्यक्ष र उहाँको समूहमा पर्न लबिङ गरिरहेका छन्’,एमालेका एक नेताले भने ।
संशोधित विधानअनुसार महाधिवेशनबाट दुई सय २५ सदस्यीय केन्द्रीय कमिटी गठन हुनेछ । यसमा १५ जना पदाधिकारी पनि पर्छन् । हालको केन्द्रीय कमिटीमा रहेका मध्ये तीन दर्जनजति नेता पदाधिकारीका आकांक्षी छन् । अनुहार दसौं महाधिवेशनमा पनि उम्मेदवार बन्ने सम्भावना छ । नागरिक दैनिकबाट