- मंगलबार, १७ असार, २०८२
काठमाण्डु, २० जेठ – सोलुखुम्बुको महाकुलुङ गाउँपालिका–३ छेस्कामस्थित प्रहरी चौकी कब्जा गर्न पुगेका नेत्रविक्रम चन्द विप्लव नेतृत्वको नेकपाका कार्यकर्ताहरु सोमबार बिहानै भागेको खुलेको छ । गएराति करिब २५–३० जनाको समुहमा पुगेका विप्लवका लडाकु बिहान झिसमिसमै भागेर सोलुखुम्बु छिरेका हुन् ।
मध्यराति १२ बजेको समयमा विप्लवका कार्यकर्ता चौकीमा पुगेका थिए । विप्लवका कार्यकर्ता चौकीतर्फ आउँदै गरेको सूचना पाएपछि ७ जना प्रहरी हतियार सहित सुरक्षित स्थानमा गएका थिए ।
प्रहरी नभेटेपछि उनीहरु बिहान ३ बजेसम्म चौकी आसापासकै क्षेत्रमा बसेका थिए । आज बिहानै काठमाण्डुबाट सशस्त्र प्रहरीको ११ जनाको र नेपाल प्रहरीको २० जनाको विशेष टोली हेलिकप्टरबाट सोलुखुम्बु पुगेर परिचालित भएको छ ।
विराटनगरबाट पनि प्रहरी टोली सोलुखुम्बु पुगेको बताइएको छ । हतियारधारी समूह जंगलमा देखिएको र त्यसतर्फ सुरक्षाकर्मी परिचालन गरिएको सशस्त्र प्रहरीले जनाएको छ ।
सोलुखुम्बुको महाकुलुङ गाउँपालिकाका अध्यक्ष सागर किराँतीले गाउँपालिकाभित्र विप्लव नेकपाका गतिविधि बढेको बताए ।
उनले केहीसमयदेखि सो पार्टीका गतिविधि बढेपछि सशस्त्र र नेपाल प्रहरीले गस्ती समेत बढाएको जानकारी दिए ।
विप्लव समूहबाट भएको चौकी आक्रमण प्रयास र पछिल्लो जानकारीबारे प्रहरीले आधिकारिक जानकारी दिएको छैन । प्रहरी प्रवक्ता विश्वराज पोखरेलले प्रहरी चौकीमा आक्रमण प्रयास नभएको र चौकी पनि नसारिएको बताए ।
सोलुखुम्बुको महाकुलुङ गाउँपालिकामा डेढ महिनादेखि विप्लव समूहका हतियारधारी कार्यकर्ताले गतिविधि गरिरहेको स्थानीयले बताएका छन् ।
विशेषगरी महाकुलुङ गाउँपालिका–५ नुर्कुममा विप्लव कार्यकर्ता गतिविधि बढेको स्थानीयले बताए । नुर्कुममा प्रहरी चौकी नभएकाले विप्लव कार्यकर्तालाई गतिविधि गर्न सजिलो पनि भएको हो । सो क्षेत्रमा विप्लव कार्यकर्ता हतियारसहित हिँडडुल गर्छन् ।
