- मंगलबार, १७ असार, २०८२
इलाम, ६ पुस–सशस्त्र द्वन्द्वका समयमा भत्काइएका र पुरानो भई ढल्न लागेका गाविस भवन निर्माणका लागि शान्ति तथा पुनः निर्माण मन्त्रालयले आर्थिक सहयोग गरेपछि भवन निर्माणको काम धमाधम शुरु हुन थालेका छन् ।
द्वन्द्वका क्रममा भत्किएका जमुना, गजुरमुखी, इभाङ र माईपोखरी गाविसको भवन चालु वर्षमा निर्माण हुने भएका छन् ।
भवन निर्माणका लागि शान्ति तथा पुनःनिर्माण मन्त्रालयबाट जिल्ला प्राविधिक कार्यालय इलाममा बजेट तथा अख्तियारी आइसकेको कार्यालय प्रमुख इञ्जिनियर ओमप्रसाद ढुङ्गानाले बताए । भवन निर्माणका लागि प्रत्येक गाविसलाई ४० लाखका दरले बजेट आएको बताइएको छ ।
इलामका धेरैजसो गाविस भवन द्वन्द्वका समयमा भत्काइएका थिए । ४३ गाविस र तीन नगरपालिका रहेको इलाममा आधाभन्दा बढी गाविस भवन बन्न बाँकी रहेको प्राविधिक कार्यालयले जनाएको छ । रासस
