एजेन्सी– उत्तर कोरियाली नेता किम जोङ उन झण्डै डेढ महिनापछि सार्वजनिक भएका छन् ।
अन्तिमपटक गत भदौ १८ गते एक संगीत कन्सर्टमा भाग लिएका ३२ वर्षीय राष्ट्रपति किम मंगलबार वैज्ञानिकहरुका लागि निर्मित आवासीय परिषरको निरीक्षण भ्रमणका क्रममा सार्वजनिक भएका हुन् ।
डेढ महिनादेखि सार्वजनिक कार्यक्रममा नदेखिएपछि उनको अवस्था र शासन सत्ताबारे अनेकन अनुमान गरिएको थियो । केही अन्तर्राष्ट्रिय सञ्चार माध्यमले उनलाई सेनाले बर्खास्ती गरेको भन्ने समाचारसमेत सार्वजनिक गरेका थिए ।
डेढ महिनापछि सार्वजनिक भएका किमको लौरो टेकेको तस्वीर त्यहाँको सरकारी सञ्चार माध्यमले सार्वजनिक गरेको छ । समाचारमा व्यक्तिगत असहजताका कारण किम लामो समय सार्वजनिक कार्यक्रममा उपस्थित हुन नसकेको जनाइएको छ ।
गत महिना उत्तर कोरियाको सरकारी टेलिभिजनले किम बिरामी रहेको समाचार सार्वजनिक गरेको थियो ।