सिन्धुलीका १३ हजार महिला घरजग्गा मालिक

काठमाण्डु टुडे २०७१ असार ५ गते १:५६ मा प्रकाशित

सिन्धुली, ५ असार– सरकारले महिलाको नाममा घरजग्गा रजिस्ट्रेसन पासमा छुट गरेपछि सिन्धुली मालपोत कार्यालयमा आफ्नो नाममा घरजग्गा रजिस्ट्रेसन पास गर्ने महिलाको सङ्ख्यामा वृद्धि भएको छ ।
सरकारले  घरजग्गा आफ्नो नाममा रजिस्ट्रेसन पास गर्दा सहरी क्षेत्रका महिलाका लागि २५ र ग्रामीण क्षेत्रका महिलाका लागि ३० प्रतिशत राजस्व छुट दिँदै आएको छ ।

जिल्ला मालपोत कार्यालयका अनुसार राजस्व छुट हुँदा सर्वसाधारणले राहत पाउनुका साथै घरजग्गा लगायतका अचल सम्पत्तिमा महिलाको स्वामित्वमा वृद्धि भएको छ । गत चार वर्षदेखि हालसम्म  जिल्लामा १३ हजार ५ सय ३२ जना महिलाको नाममा घरजग्गा पास भएको कार्यालय प्रमुख किरणकुमार भट्टराईले जानकारी दिए ।

पछिल्लो समय सरकारले दिएको राजस्व छुट र सामाजिक चेतनासँगै आएको  परिवर्तनले जिल्लामा महिलाको नाममा घरजग्गा राजिस्ट्रेसन गराउनेको सङ्ख्यामा वृद्धि भएको उनले बताए ।

गत एक वर्षमा मात्र जिल्लाका एक हजार ७३६ जना महिलाले आफ्नो नाममा घरजग्गा स्वामित्वसहितको राजिस्ट्रेसन पास गराएका छन् । सहरी क्षेत्रमा ६०३ जना र ग्रामीण क्षेत्रका ९४३ र ९० जना दलित महिलाको नाममा घरजग्गा दर्ता भएको र गत वर्षको तुलनामा झन्डै ४० प्रतिशतले बढी भएको भट्टराईले जानकारी दिए ।

सरकारले ७० वर्षमाथि उमेरका वृद्धको नाममा स्वामित्व दर्ता भएमा पनि महिलासरह राजस्वमा छुट दिने व्यवस्था रहेको भए पनि जिल्लामा यस्तो उमेरमाथिका नागरिकको नाममा रजिस्ट्रेसन पास भने शून्य रहेको छ ।

Copyright © 2016 kathmandutoday.com Department of Information Reg No:460/074/75 About Us