काठमाण्डु, ३० जेठ – राप्रपाका नेता पशुपति शमशेर राणाले आफू पार्टीको आधिकारिक अध्यक्ष भएको दावी गरेका छन् ।
शुक्रबार आयोजित साक्षात्कार कार्यक्रममा राणाले पार्टी अध्यक्ष सूर्यबहादुर थापाले पदत्याग गरेपछि पार्टीका १०४ केन्द्रीय सदस्यमध्ये ८२ जनाले आफूलाई अध्यक्षमा निर्वाचित गरेको जानकारी दिए ।
राप्रपाका अर्का नेता लोकेन्द्रबहादुर चन्दले पनि आफैंलाई पार्टीको अध्यक्ष घोषणा गर्नु गैरराजनीतिक भएको उनको तर्क थियो ।
नेता चन्दले दाबी गरेजस्तो चक्रीय प्रणालीबाट नेतृत्व चयन गर्ने प्रस्तावलाई पार्टी महाधिवेशनले अस्वीकार गरेको उनको स्पष्टोक्ति थियो ।
पार्टीको विवाद अन्त्यका लागि असन्तुष्ट पक्षलाई पनि साथै लैजान आफू तयार रहेको बताए ।
उनका अनुसार असन्तुष्ट पक्षसँग सहमति कायम गर्न पार्टी सहमहामन्त्री हेमजङ्ग गुरुङ र केन्द्रीय सदस्य रोशनी कार्की रहेको वार्ता समिति गठन गरिएको छ ।