- सोमबार, २४ वैशाख, २०८१
काठमाण्डु, १६ चैत – लोक गायिका मञ्जु महतका आफन्तलाई क्षतिपूर्ति नदिएसम्म कलाकारहरुले शव नबुझ्ने बताएका छन् ।
माइक्रो व्यवसायी समितिले क्षतिपूर्ति दिन आलटाल गरेको भन्दै कलाकारहरु आन्दोलनमा उत्रिने चेतावनी दिएका छन् ।
समितिले वार्तामा ठोस निर्णय गर्न नसक्ने प्रतिनिधि पठाएको र क्षतिपूर्ति दिन नसक्ने भनेपछि कलाकारले आन्दोलनको तयारी गरेको राष्ट्रिय लोक तथा दोहोरी गीत प्रतिष्ठानका अध्यक्ष चन्द्र शर्माले बताए ।
हिजो रातिसम्म कलाकार र माइक्रो व्यवसायीबीच भएको वार्ता बिना निष्कर्ष टुङिगएको थियो ।
माइक्रोवसको ठक्करबाट गम्भिर घाइते भएकी महतको ग्राण्डी अस्प्तालमा उपचारका क्रममा हिजो निधन भएको थियो ।
स्कुटीमा सवार महतलाई गएको बिहिवार काठमाण्डुको गल्कोपाखामा माइक्रोबसले ठक्कर दिएको थियो ।
ठक्करबाट उनकी बहिनी लक्ष्मी महत घाइते भएकी छन् ।
लक्ष्मीको उपचार र मृतक महतको छोरोछोरीको पालनपोषणको व्यवस्था समितिले गर्नुपर्ने माग कलाकारले राख्दै आएका छन् ।
गायिका महतको शव अझै ग्राण्डी अस्पतालमा राखिएको छ ।
