काठमाण्डु, १२ माघ– पूर्व प्रधानन्यायाधीश विश्वनाथ उपाध्याय मस्तिष्काघात (ब्रेन ह्यामरेज) का कारण बाँसबारीस्थित राष्ट्रिय इन्स्टिच्युट अफ न्युरोलोजिक र एलाइड साइन्सेजमा शनिबार भर्ना भएका छन् ।
२०४७ को संविधान मस्यौदा समितिका अध्यक्षसमेत रहेका ८४ वर्षीय उपाध्यायको मस्तिष्कमा रगत जमेको पाइएको र वरिष्ठ चिकित्सक डा उपेन्द्र देवकोटाको नेतृत्वको टोलीले जमेको रगत हटाउन आकस्मिक शल्यक्रिया गरेको अस्पतालले जनाएको छ ।
उनको मस्तिष्कमा रगत जमेका कारण चेतना शक्ति ह्रास हुँदै गएको अस्पतालद्वारा आज जारी स्वास्थ्य बुलेटिनमा जनाइएको छ ।
उपाध्यायलाई शल्यक्रियापछि रातभरि भन्टिलेटरमा राखिएकामा आइतबार विहानदेखि भेन्टिलेटर हटाइएको छ ।
अहिले उनको स्वास्थ्य अवस्था गम्भीर र स्थिर रहेको छ । उनको उमेरको अवस्थाको कारण ठूलो स्तरको शल्यक्रियालगायतका थप उपचारमा कठिनाइ भएको अस्पतालका प्रशासकीय अधिकृत विधायकर अधिकारीले जानकारी दिए । रासस