काठमाण्डु, १९ मंसिर- मधेसी जनअधिकार फोरम लोकतान्त्रिकका अध्यक्ष विजयकुमार गच्छदारमाथि किर्ते गरेको आरोपसहित उजुरी परेपछि संविधानसभा अदालतले उनलाई १० दिनभित्र उपस्थित हुन आदेश दिएको छ ।
बिहिबार अदालतका अध्यक्ष क्ल्याण श्रेष्ठ र सदस्यहरु सुशीला कार्की र गिरिशचन्द्र लालको संयुक्त इजलासले सो आदेश दिएको हो । सो उजुरीमा अन्तरिम आदेश दिन पर्ने कि नपर्नेबारे निक्र्यौल गर्नका लागि गच्छारसँग छलफलका लागि उपस्थितिको आदेश दिएको हो ।
संविधानसभाको निर्वाचनमा सुनसरी क्षेत्र नं ३ बाट किर्ते गरेर जितेको भन्दै बुधबार उनका निकटतम प्रतिद्वन्द्वीले संविधानसभा अदालतमा मुद्धा हालेका थिए । उनीविरुद्ध एमालेका उम्मेदवार भगवती चौधरीले मतपेटिका साटेर किर्ते गरेको मुद्धा हालेका हुन् ।
चौधरीले मतपेटिका विराटनगरतिर लगेर साटेको, आफ्नो २८ सय मतमा नक्कली स्वस्तिक प्रयोग भएको लगायतका बुँदाहरु समेटी आवश्यक छानबिनको मागसहित अदालतमा मुद्धा दर्ता गराएकी हुन् ।
चौधरीले गच्छदारलाई सभासदबाट हटाएर छानबिन गर्नुपर्ने र आफूलाई सो स्थानबाट विजयी घोषणा गरेर सभासद बनाउनु पर्ने माग गरेकी छिन् ।