काठमाण्डु, १५ मंसिर– राष्ट्रिय एड्स तथा यौनरोग नियन्त्रण केन्द्रले कतिपय एचआइएभी सङ्क्रमित तथा एड्स भएका समाजमा किन लुकेर बसिरहेका भन्दै के बाहिर आउन नसक्नुका कारण पत्ता लगाउन चुनौती रहेको बताएको छ ।
२६ औं विश्व एड्स दिवसका सन्दर्भमा शनिबार आयोजित छलफलमा केन्द्रले सन् २०१२ मा गरेको पछिल्लो अध्ययनमा एचआइभी सङ्क्रमितको सङ्ख्या ४८ हजार ६ सय रहेको छ । यसमा १५ देखि ४९ वर्षको जनसङ्ख्यामा एचआइभी सङ्क्रमण दर ०.२८ रहेको छ ।
नेपालमा दैनिक चारदेखि छ जनामा एचआइभी सङ्क्रमण हुने र बर्सेनि ४ हजार ८ सय को मृत्युको कारकतत्व एचआइभी÷एड्स नै हुने गरेको राष्ट्रिय एड्स तथा यौनरोग नियन्त्रण केन्द्रको तथ्याङ्क छ । विश्वमा प्रत्येक घन्टामा २ सय ६२ जना सो रोगबाट सङ्क्रमित हुने गर्दछन् । उसो त विश्वमा प्रत्येक दिन चार हजार ४ सय जना एचआइभी/एड्सका कारण मृत्यु हुने गर्दछ ।
४ हजार बालबालिका संक्रमित
अर्काेतर्फ रगत परीक्षणबाट २२ हजार ९ सय ९४ जनामा एचआइभी सङ्क्रमण भएको पाइएको केन्द्रले जनाएको छ । यो तथ्याङ्क असार मसान्तसम्मको रहेको केन्द्रका निर्देशक डा.नरेशप्रताप केसीले जानकारी दिए । उनका अनुसार एचआइभी सङ्क्रमित बालबालिकाको सङ्ख्या ४ हजार रहेको छ ।
निर्देशक केसीले कार्यक्रममा नेपालमा एचआइभी÷एड्स केन्द्रीकृत महामारीका रुपमा रहेको जानकारी दिनुभयो । एक वा एक बढी उच्च जोखिम रहेका समूहमा एचआइभी सङ्क्रमण पाँच प्रतिशतभन्दा बढी तर सामान्य जनसङ्ख्यामा एक प्रतिशतभन्दा कम भएको अवस्थालाई केन्द्रीकृत महामारी भन्ने गरिन्छ ।
विदेश जाने जोखिममा
एचआइभी सङ्क्रमणको उच्च जोखिममा रहेका समूहमा सुईद्वारा लागुपदार्थको प्रयोगकर्ता, यौनकर्मी, तिनका ग्राहक, पुरुष समलिङ्गी, रोजगारीका लागि भारत तथा तेस्रो मुलुक जाने तथा तिनका दम्पत्ती रहेका छन् । यस्ता समूहलाई लक्षित गरी केन्द्रले राष्ट्रिय एचआइभी एड्स रणनीति लागू गरिराखेको केन्द्रका निर्देशक डा.केसीले जानकारी दिए ।
कार्यक्रममा केन्द्रले एचआइभी÷एड्स भएकाका विभिन्न ४४ केन्द्रमा एआरटी (एन्टिरेट्रोभाइरल ट्रिटमेन्ट) सेवा उपलब्ध गराइराखेको र यस्ता केन्द्रमा आउनेको सङ्ख्या आठ हजार ५ सय ४६ रहेको, एचआइभी सङ्क्रमित गर्भवती आमाबाट बच्चामा हुने सङ्क्रमणको जोखिम कम गर्ने सेवा ६२ केन्द्रमा उपलब्ध गराइएको, यस्तो सेवा लिने आमाको सङ्ख्या १ सय ६२ भन्दा बढी भएको जानकारी दिएको थियो ।
आइतबार एड्स दिवस
‘एचआइभीको नयाँ सङ्क्रमण, भेदभाव र एड्सबाट हुने मृत्युलाई हुने शून्यमा पुर्याऔँ’ भन्ने नाराका साथ आइतबार नेपालमा पनि विविध कार्यक्रम आयोजना गरी विश्व एड्स दिवस मनाइँदै छ ।
एचआइभी र एड्ससम्बन्धी प्रभावकारी रोकथाम, उपचार, हेरचाह तथा सहयोगका लागि विश्वव्यापी समर्थन जुटाउँदै बृहत्तर जनचेतना जगाउने उद्देश्यले विश्व स्वास्थ्य सङ्गठनको आह्वानमा डिसेम्बर १ लाई विश्व एड्स दिवस मनाइने गरिन्छ ।