काँग्रेस एमालेका सभासदलाई संबिधान नबन्ने चिन्ता

गुल्मी,१४ मङ्सिर–नेपाली काँग्रेसका केन्द्रीय सदस्य एवम गुल्मी–२ का संविधानसभा सदस्य चन्द्र भण्डारीले राजनीतिक दलमा सत्ता लिप्साको प्रवृत्ति बढेकाले आफूलाई फेरि देश बिग्रने डर लागेको बताएका छन ।
गुल्मीको तम्घासमा आयोजित सम्मान कार्यक्रममा उनले भने“अब मन्त्री बन्न आपसमा लडाइँ हुन्छ, यस्तो संस्कारको अन्त्य नभए जनताको अपेक्षा पूरा हुँदैन ।” धेरै राजनीतिक दलमा नेतृत्व असक्षम रहेको पनि उनले बताए ।
यसैबीच, नेकपा (एमाले)का केन्द्रीय सदस्य एवम् गुल्मी ३ का संविधानसभा सदस्य गोकर्ण विष्टले सदरमुकाम तम्घासमा आयोजित एक कार्यक्रममा जनताले दिएको जिम्मेवारी पूरा गर्ने काम चुनौतीपूर्ण भएको बताए ।
चुनाव जितेकामा खुसीभन्दा नयाँ संविधान कसरी बनाउने भन्ने चिन्ताले आफू हाँस्न नसकेको उनको भनाई थियो । रासस