एनआरएनएको सचिवमा पुष्पराज तिमिल्सिनाको उम्मेदवारी

काठमाण्डु २ कात्तिक–गैरआवासीय नेपाली संघ अन्तर्राष्ट्रिय समन्वय परिषद (एनआरएनए—आइसीसी) को आगामी महाधिवेशनका लागि पुष्पराज तिमिल्सिनाले सचिव पदमा उम्मेदवारी घोषणा गरेका छन ।
स्पेनका तर्फबाट अन्तर्राष्ट्रिय समन्वय परिषद् सदस्य समेत रहेका तिमिल्सिनाले ११ बुँदे प्रतिबद्धतासहित सचिवमा उम्मेदवारी घोषणा गरेका हुन । एनआरएनएको छैंटौ विश्व सम्मेलन शनिबारदेखि काठमाण्डुमा हुँदैछ ।
स्पेनमा व्यापार व्यवसायमा संलग्न हुँदै आएका तिमिल्सिना लामो समयदेखि गैरआवासीय नेपाली संघमा सक्रिय छन । एनआरएन स्पेनलाई विवादमुक्त बनाउँदै एकढिक्का र शसक्त बनाउन प्रभावकारी भूमिका खेलेका तिमिल्सिनाले एनआरएन अभियानलाई अझ शसक्त, सबल, सुदृढ र संस्थागत विकासका लागि सचिव पदमा उम्मेदवारी दिन लागेको बताए ।
एनआरएनका क्रियाकलापहरुको निरन्तरताका लागि नेतृत्वदायी र सक्रिय भूमिका निर्वाह गर्न, नेपाली नागरिकताको निरन्तरता, एनआरएनको नेपालमा विधिवत दर्ता, एनआरएनलाई गैरराजनीतिक रुपमा संचालन गर्न, वैदेशिक रोजगारीमा भोग्नुपरेका समस्याहरुको न्यूनीकरण लगायत तिमिल्सिनाको एजेण्डा रहेका छन् ।
स्पेनिससँगको संयुक्त लगानीमा कास्कीमा हाउजिङ र हाइड्रोपावर कम्पनी संचालनको तयारीमा रहेका तिमिल्सिनाले नेपालमा गैरआवासीय नेपाली तथा वैदेशिक लगानी भित्राउन पहल गर्ने बताए । तिमिल्सिना नेपाली लोकतान्त्रिक मञ्च स्पेनका संस्थापक अध्यक्ष समेत हुन ।