भारतमा नयाँ राज्यको विवादमा प्रदर्शन तथा राजिनामा

काठमाण्डु टुडे २०७० असोज १८ गते १७:५१ मा प्रकाशित

अनन्तपुरम, १८ असोज–भारतको मन्त्रिपरिषद्ले नयाँ राज्य तेलङ्गना सिर्जनाका लागि लामो समयसम्मको प्रदर्शन तथा कहिलेकाँही हुने हिंसाप्रति झुक्दै सकारात्मक निर्णय गरेको एक दिनपछि शुक्रबार यस निर्णयको विरोधमा दक्षिणपूर्वी भागमा प्रदर्शन देखा परेको छ । सो प्रकरणमा केही सङ्घीय मन्त्रीले राजिनामा समेत दिएका छन ।
प्रधानमन्त्री मनमोहन सिंहको मन्त्रिपरिषद्ले आन्ध्र प्रदेशलाई विभाजन गर्ने विवादस्पद निर्णय गरेपछि प्रदर्शनकारीले यस प्रदेशको तटीय क्षेत्रका सडकहरू बन्द गरी दिएका छन् ।
संसदले सहमति दिएमा तेलङ्गना भारतको २९ औँ राज्य हुनेछ । नयाँ राज्यका पक्षधरहरूले यस क्षेत्रलाई आन्ध्र प्रदेशका सरकारहरूले ध्यान नदिने गरेको आरोप लगाउने गरेका छन् ।
हैदराबादबाट ४०० किलोमिटर परको अनन्तपुरममा प्रदर्शनकारीहरूले नारा लगाएर सत्ताधारी कङ्ग्रेस पार्टीको पोस्टर च्याते ।
नयाँ दिल्लीमा मानव संसाधनमन्त्री पल्लम राजुले आफूले विरोधमा मन्त्री पद त्याग गरेको पुष्टि गरेका छन् । पर्यटनमन्त्री चिरञ्जीवी तथा टेक्स्टाइल मन्त्री के.एस. रावले राजिनामा दिएको पीटीआई समाचार संस्थाले जानकारी दिएको छ ।
आन्ध्र प्रदेशमा सत्ताधारी कङ्ग्रेस पार्टीका पूर्व सहयोगी तथा हाल प्रतिद्वन्द्वी वाई.एस. जगनमोहन रेड्डीले यस निर्णयको विरोधमा आफू अनिश्चितकालीन भोक हडतालमा जाने र प्रदर्शन निरन्तर रहने बताए ।
यस क्षेत्रको प्रमुख नगर सूचना प्रविधिको केन्द्र हैदरावादले कम्तीमा आउँदो १० वर्षका लागि दुवै राज्यको केन्द्रको रूपमा काम गर्नेछ ।
भारतमा सन् २००० मा थप तीन नयाँ राज्य स्थापना भएका थिए । आलोचकहरूले भारत जातीय रूपमा विविधतायुक्त मुलुक भएकाले तथा निकै पृथकतावादी आन्दोलन चलिरहेकाले यस पाइलाले नयाँ राज्य स्थापनाको समाधान गर्नै नसकिने समस्या आरम्भ हुने धारणा व्यक्त गरेका छन् । रासस/एएफपी

Copyright © 2016 kathmandutoday.com Department of Information Reg No:460/074/75 About Us