आर्थिक वृद्धि साढे चार प्रतिशतमा सीमित रहने आइएमएफको प्रक्षेपण

काठमाण्डु टुडे २०७० असोज १८ गते ११:५० मा प्रकाशित

काठमाण्डु १८ असोज–अन्तर्राष्ट्रिय मुद्राकोष (आइएफएफ)ले चालु आर्थिक वर्षमा मुलुकको आर्थिक वृद्धिदर साढे चार प्रतिशतमा सीमित हुने प्रक्षेपण गरेको छ ।
नेपालको पछिल्लो समग्र आर्थिक अवस्थाको मूल्याङ्कनका साथै वित्तीय क्षेत्र, सार्वजनिक खर्च व्यवस्थापन, कर व्यवस्थापनलगायत सुधारका प्रयासमा भएको प्रगतिको विश्लेषण गर्न आएको आइएफएफ टोलीले यो आर्थिक वर्षमा सरकारले प्रक्षेपण गरेभन्दा कम आर्थिक वृद्धि हुने जनाएको छ ।
,साताव्यापी भ्रमण पूरा गरी वासिङ्टन प्रस्थान गर्नुअघि आइएमएफले भनेको छ“चालु आर्थिक वर्षका लागि समयमा नै बजेट सार्वजनिक भएको र बेलैमा मनसुनी वर्षा भएकाले कृषि क्षेत्रको उत्पादकत्व वृद्धि हुनेमा हामी आशावादी छौँ ।”
काठमाण्डुस्थित आइएमएफका वरिष्ठ आवासीय प्रतिनिधि टमस जे रिचर्डसनले अमेरिकी डलरसँग नेपाली मुद्राको अवमूल्यनले बजारमा चाप परेको र मूल्यवृद्धि बढेको उल्लेख गर्दै विप्रेषण आप्रवाहले भुक्तानी सन्तुलन कायम रहेको बताए ।
नेपाल आयल निगमले अधिक घाटा व्यहोर्नुको प्रमुख कारण पेट्रोलियम पदार्थ कोक अन्तर्राष्ट्रिय बजारभाउ अनुसार मूल्य समायोजन नहुनु हो भन्दै उनले गरिबलाई मात्र अनुदान दिनुपर्नेमा जोड दिए । धनी र गरिबका लागि एउटै मूल्य हुन नहुने उनको भनाई थियो । “सुविधासम्पन्न लाखौँ लाखका गाडी चढ्नेहरूलाई पेट्रोलको मूल्य परल मोलमा बेचेर हुँदैन”, पेट्रोलको मोल धनाड्य वर्गको हितमा रहेको उनले बताए ।
घरीघरी निगमलाई ऋण दिएर समस्याका दीर्घकालीन समाधान नहुने उनको भनाई थियो । पेट्रोलियम पदार्थमा बाहिरिएको विदेशी मुद्रा थेग्नै नसक्ने स्थितिमा पुगेको उनले बताए । ऊर्जा विकास, सडकलगायत पूर्वाधार निर्माणमा मिसनले जोड दिएको जानकारी दिँदै उनले वित्तीय क्षेत्र जोखिम पनि यथावत रहेकाले गम्भीर भएर लाग्न सुझाव दिए ।
मिसनले अर्थमन्त्री शङ्करप्रसाद कोइराला, राष्ट्रिय योजना आयोगका उपाध्यक्ष रवीन्द्रकुमार शाक्य, नेपाल राष्ट्र बैंकका गभर्नर युवराज खतिवडा, अर्थसचिव शान्तराज सुवेदीलगायत सरकारी अधिकारी, नेपालको विकासका साझेदार र निजी क्षेत्रका प्रतिनिधिहरूसँग बेग्लाबेग्लै भेटेर नेपालको आर्थिक स्थिति एवम् यसको गतिशीलताका निम्ति अवलम्बन गर्नुपर्ने उपायबारे छलफल गरेको थियो । रासस

Copyright © 2016 kathmandutoday.com Department of Information Reg No:460/074/75 About Us