साना किसान परिवारका दुईसय बढी नेपाली विद्यार्थी इजरायल प्रस्थान

काठमाण्डु, ११ कात्तिक–इजरायल सरकारको पूर्ण छात्रवृत्तिमा २०४ जना साना किसान परिवारका सदस्य कृषि प्रविधि एवम् सीप सिक्न सोमबार इजरायल प्रस्थान गरेका छन् ।
साना किसान विकास बैंकसँग आबद्ध साना किसान सहकारी संस्थासँगको सहकार्यमा इजरायलले नेपाली किसानको उत्पादकत्व बढाउन तथा आधुनिक कृषि प्रणालीमा उन्मुख गराउन उनीहरूका परिवारका सदस्यलाई छात्रवृत्ति उपलब्ध गराएको हो ।
इजरायलका प्रतिष्ठित आर्भा अन्तर्राष्ट्रिय कृषि तालिम केन्द्र, रामाट नेगेभ क्षेत्रीय कृषि तालिम केन्द्र र केनेट कलेजमा एकवर्ष व्यावहारिक तालिममा सहभागी उनीहरूले मासिक पारिश्रमिकसमेत पाउने यहाँस्थित इजरायली राजदूतवासले जनाएको छ ।
खेतवारीमा गएर प्रयोगात्मक अभ्यासमा सहभागी हुने नेपाली विद्यार्थीले मासिक एकलाख रुपैया भन्दा बढी तलब प्राप्त गर्नेछन् । नेपालका लागि इजरायलका राजदूत हनान गोडेर, बैंक र सहकारीका अधिकारीहरूले उनीहरूलाई विमानस्थलमा बिदाइ गरेका थिए ।
तालिम पूरा गरेर आएका विद्यार्थीले नेपालको कृषि क्षेत्रको विकासमा उल्लेख्य योगदान गर्ने विश्वास इजरायलले लिएको उक्त मुलुकको दूतावासले जारी गरेको विज्ञप्तिमा जनाइएको छ ।