दशैको मुखमा हवाई सेवा ठप्प पार्ने चेतावनी

काठमाण्डु २६ भदौ –बायू सेवा संञ्चालक संघले तीन बुँदे माग प्रस्तुत गर्दै सम्बन्धित निकायले १५ दिनभित्र पुरा नगरे दशैको मुखमा हवाई सेवा ठप्प पार्ने चेतावनी दिएको छ । संघले बुधवार काठमाण्डुमा पत्रकार सम्मेलन गरेर सरकारले अब्यवहारिक रुपमा हवाई ईन्धनको मुल्य बृद्धि गर्दा बायू सेवा सञ्चालक र त्यसका उपभोक्ताहरु मारमा पर्ने गरेकोले आफूहरु बाध्य भएर आन्दोलनमा उत्रनु पर्ने अवस्था आएको दावी गरेको छ ।
संघले डिजेल, मट्टीतेल र एलपी ग्यासमा अनुदान दिन हवाई ईन्धनमा अध्याधिक मुल्य बृद्धि गर्ने सरकारी नीति अब्यवहारिक भएको भन्दै त्यसको खारेजी, हवाई ईन्धनमा आयल निगमको एकाधिकारले गर्दा सेवा महंगो र सहज नभएकोले नीजि क्षेत्रको लागि पनि सेवा खुल्ला गर्नु पर्ने र हवाई ईन्धन पाउन तीन साताको खपतबराबरको मुल्य एकै पटक जम्मा गर्ने प्रावधानको साटो बैंक ग्यारेन्टी स्वीकार गर्नु पर्ने ब्यवस्था गर्न माग अघि सार्दै त्यस्तो चेतावनी दिएको हो ।
संघका अध्यक्ष क्याप्टेन रामेश्वर थापाले मट्टिेल, ग्यास र डिजेलको घाटा हवाई ईन्धनबाट असुल्ने पञ्चायतकालिन क्रस सब्सिडीको ब्यवस्थाका कारण सर्वधारणका लागि हवाई सेवा महंगो भएको भन्दै त्यसलाई तत्काल खारेजी गरी नीजि क्षेत्रले समेत ईन्धन वितरण गर्न पाउँने ब्यवस्था सहित सो ब्यवस्था खारेज गर्नु पर्ने बताए । उनले आयल निगमले २० प्रतिसत भन्दा बढी मुनाफा लिन नपाउने सरकारी ब्यवस्थालाई समेत चुनौति दिदै हवाई ईन्धनमा २५ प्रतिसत नाफा लिईरहेको भन्दै सरकारले आफूहरुले अघि सारेको माग पुरा गरे हवाई यातायात सस्तो हुने समेत बताए ।
थापाले भने–‘पञ्चायत कालमा हवाई यातायातलाई धनिहरुको सवारी भनेर क्रस सब्सिडीको ब्यवस्था गरिएको थियो । तर अहिले यो रहर भन्दा पनि बाध्यता भएकोले सरकारले यस्तो आउटडेटेड ब्यवस्था तत्काल खारेज गर्नु पर्छ । आयल निगमको एकाधिकार अन्त्य गरे पनि ईन्धनको मुल्य सस्तो हुन्छ । यस तर्फ सरकारले ध्यान दिनु पर्छ ।’
उनले आफूहरुले पर्यटन तथा नागरिक उड्ययन मन्त्री रामकुमार श्रेष्ठलाई बुधवार नै माग पत्र बुझाएको जानकारी दिदै १५ दिन भित्र माग पुरा नभए बाध्यताबस दशैको मुखमा हवाई सेवा ठप्प पार्नु पर्ने बाध्यता औल्याए । थापाले भने– ‘माग पुरा नभए दुई घण्टा, आधा दिन, पुरा दिन गर्दै क्रमस बन्द गर्दै जान्छौ ।’
संघका महासचिव सुमन पाण्डेले हवाई ईन्धनमा मुल्य बढाएर अन्यमा अनुदान दिदा वर्षेनी हवाई यात्रा गर्ने १५ लाख नेपाली नागरिक समस्यामा पर्ने गरेको र हवाई ईन्धनको महंगीले अन्तर्राष्ट्रिय सेवाको पनि मुल्य बृद्धि गर्नु पर्दा पर्यटकमा समेत नराम्रो असर पर्ने गरेको गुनासो गरे । उनले पनि तत्काल क्रस सब्सीडि खारेजी, बंैक ग्यारेन्टी स्विकानु पर्ने र ईन्धनको वितरण नीजि क्षेत्रकोलागि खुल्ला गरेर अहिलेको भन्दा हवाई ईन्धनको मुल्य कम हुने बताए ।