- सोमबार, १५ असार, २०८३
काठमाण्डु, ५ कात्तिक – सार्वजनिक लेखा समितिले नेपाल पर्यटन बोर्डका प्रमुख कार्यकारी अधिकृत सुवास निरौलालाई निलम्बन गर्न निर्देशन दिएको छ ।
बुधबार बसेको समितिको बैठकले करोडौंको अनियमितामा प्रत्यक्ष संलग्न देखिएको ठहर गर्दै बोर्डका प्रमुख कार्यकारी अधिकृत निरौलालाई निलम्बन गर्न पर्यटन मन्त्रालयलाई निर्देशन दिएको हो ।
समितिको निर्णयमा भनिएको छ- ‘सार्वजनिक खरिद कानुनको पालना नगरी खरिद गर्ने, प्रमाण र औचित्य बिना खरिद गर्ने, असम्बन्धित व्यक्तिलाई गैरकानुनी भुक्तानी दिने, लेखाका विवरणहरु सही र यथार्थ नराख्ने लगायतका क्रियाकलापमा निरौलाको प्रत्यक्ष संलग्नता देखियो ।’
बैठकले अनियमितताबारे छानबिन गर्न गठित समिति र महालेखापरीक्षकको प्रतिवेदनमा उल्लेखित बेरुजुलाई समेत आधार बनाइ थप अनुसन्धान तथा कारवाही गर्न सम्बद्ध निकायलाई निर्देशन दिएको छ ।
निरौलाको भ्रष्टाचारको बारेमा अख्तियार दुरुपयोग अनुसन्धान आयोग तथा सम्पत्ति शुद्धिकरण बिभागलाई समेत पत्राचार गर्ने निर्णय गरेको समितिका सभापति जर्नादन शर्माले जानकारी दिए ।
यसअघि निरौलालाई कारवाही गर्ने सम्बधमा कांग्रेस सभासदहरु सहमत नभएपछि गत सोमवारको बैठकले निर्णय लेख्न अलग्गै समिति गठन गरेको थियो ।
