- शुक्रबार, ८ साउन, २०८३
काठमाण्डू, ६ जेठ– परराष्ट्रमन्त्री शिशिर खनालले बालेन शाह नेतृत्वको नयाँ सरकारको प्राथमिकताबारे छिमेकी राष्ट्र चीनले पनि चासो राखेको बताएका छन ।
आज (बुधबार) प्रतिनिधिसभा अन्तर्गतको अन्तर्राष्ट्रिय सम्बन्ध समितिको बैठकमा मन्त्री खनालले नयाँ सरकारको चीनसँग पनि संवाद भइराखेको जानकारी गराएका हुन । ‘उत्तरी छिमेकीसँग पनि निरन्तर सम्पर्क सम्पर्क र संबादमा हामी छौं,’ परराष्ट्रमन्त्री खनाल भन्छन्, ‘हाम्रो आफ्नै प्राथमिकताका विषयमा उहाँहरूले चासो राख्नु भएको छ ।
नयाँ सरकार बनिसकेपछि कस्तो खाले विषय प्राथमिकतामा छन् भन्ने उहाँहरूको अलि बढी चासो छ । त्यसमा हामी निरन्तर सम्पर्कमा नै छौं ।’रास्वपा दुई सिट कम दुइ तिहाइ बहुमतमा छ । रास्वपाको एकल बहुमतको सरकार रहेका बेला चीनले नयाँ सरकारको प्राथमिकता के कसो छन् भनेर चासो राखेको हो ।
उनका अनुसार सरकार नेपाललाई बलियो र गतिशील राष्ट्रका रुपमा अगाडि बढाउनेतर्फ केन्द्रित छ । मन्त्री खनाल भन्छन्, ‘भूराजनीति जटिलताका बाबजुद नेपाललाई एउटा बलियो, स्थिर, गतिशील राष्ट्रका रुपमा अगाडि बढाउने क्रममा परराष्ट्र मन्त्रालय साना–साना मसिना पालिकाका डकुमेन्टदेखि समग्र अन्तर्राष्ट्रिय सम्बन्ध र युएनमा हाम्रो प्रेजेन्ससम्मका विषयमा हामी एकदमै मेहनतका साथ लागि राख्या छौं ।’
